Нови членови на Советот за безбедност се Малинка Ристевска-Јорданова, експерт за евроинтеграции; Џевдет Хајредини, поранешен министер за финансии и Владимир Спиридонов, експерт за климатски промени.
Тројца нови членови назначи претседателката Гордана Сиљановска-Давкова на Советот за безбедност, информираат од нејзиниот кабинет.
Така, нови членови на Советот за безбедност се Малинка Ристевска-Јорданова, експерт за евроинтеграции; Џевдет Хајредини, поранешен министер за финасии и Владимир Спиридонов, експерт за климатски промени.
Со ова, како што се вели во соопштението од претседателски кабинет, сега Советот за безбедност на Република Северна Македонија е во целосен состав.
Претседател на Советот за безбедност е претседателката на државата Гордана Сиљановска-Давкова.
Членови на Советот за безбедност се:
- Африм Гаши, претседател на Собранието
- Христијан Мицкоски, претседател на Владата
- Панче Тошковски, министер за внатрешни работи
- Владо Мисајловски, министер за одбрана
- Тимчо Муцунски, министер за надворешни работи и надворешна трговија,
- Џевдет Хајредини, поранешен министер за финансии
- Малинка Ристевска Јорданова, експерт за евроинтеграции
- Владимир Спиридонов, експерт за климатски промени.
Инаку, Советот за безбедност е највисоко советодавно тело што ги разгледува прашањата поврзани со безбедноста и одбраната на државата и дава предлози на Собранието и на Владата.
Седниците на Советот се затворени, освен во одредени случаи кога можат да бидат и јавни, за што одлучува претседателот на ова тело.
Начинот на работа на Советот за безбедност на Република Северна Македонија, начинот на остварување на правата и исполнувањето на должностите на членовите на Советот, свикување и одржување на седниците, спроведувањето на заземените ставови, поведените иницијативи и дадените мислења и предлози, информирањето за својата работа, како и други прашања во врска со организирањето и начинот на работа на Советот, се определени со Деловник за работа на Советот за безбедност на Република Северна Македонија.
На почетокот на летото претседателката најави дека наскоро ќе ги пополни и местата во Советот за безбедност, со експерти за глобалните проблеми, за евроинтеграциите и за климатските промени.