Претседателката во воведно обраќање на настан во Вилата „Водно“ се осврнала и на компаративни искуства од проширувањето на Европската Унија, при што укажала на примери на вклучување во членство на земји кандидатки коишто не исполнувале некои од критеририумите за членство во ЕУ, како доказ за двојни стандарди и нарушен кредибилитет на Унијата
Барањата на соседите со коишто се соочуваме со децении отстапуваат од Копенхашките критериуми и не се во духот на конститувните акти на Европската Унија. Ова го кажала претседателката на државата, Гордана Сиљановска-Давкова, во својот воведен говор со кој ја отворила панел-дискусијата на „Европските демократски студенти“ (ЕДС), учесници на „Зимскиот универзитет ЕДС 2026“, што годинава се одржув во Скопје, соопштија од нејзиниот кабинет.
Тема на панел-дискусијата била демократијата, безбедноста и европската иднина на Западен Балкан.
„Сиљановска-Давкова укажа на кризата на демократијата во светот и Европа, како и на демократскиот дефицит на ЕУ, на сериозните безбедносни закани, како и на неодржливоста на исклученоста на државите од т.н. Западен Балкан од членството на ЕУ“,
се вели во соопштението.
Говорејќи за евроинтегративниот пат на Македонија, таа, како што наведуваат од нејзиниот кабинет, потсетила на десетината „да“ од страна на Европскиот парламент и на Европската комисија за пристапните преговори на земјава и на уште толку „не“ од Европскиот совет „заради вето од некои соседи“.
Претседателката се осврнала и на компаративни искуства од проширувањето на Европската Унија, при што укажала на, како што се наведува, примерите на вклучување во членство на земји кандидатки коишто не исполнувале некои од критеририумите за членство во ЕУ, како доказ за двојни стандарди и нарушен кредибилитет на Унијата.
Сиљановска-Давкова посочила дека Западен Балкан не е товар за апсорпциониот капацитет на ЕУ и приемот на земјите од овој регион во Унијата ќе означи крај на вештачката поделба на Запад и Исток, „ќе стави крај на балканизацијата и ќе обезбеди поголема безбедност на ЕУ, но и на Европа“.
Според претседателката, иако во моментов е тешко да се зборува за реформи на ЕУ, тие се неопходни.
Сиљановска-Давкова рекла оти очекува Европската Унија итно да го преиспита својот однос и политика кон Западниот Балкан, имајќи ги предвид растечките безбедносни закани и дилеми во воен и несигурен меѓународен амбиент, нарушена, драматичната промена на меѓународниот поредок, минимизиран мултилатерализам и сериозната криза на лидерство.
„Војните се плодна почва за авторитаризам, републикански монархизам, од типот на бонапартизам, но и опасност од нови мигрантски бранови“,
рекла таа.
Сепак, како што се додава во соопштението, Сиљановска-Давкова рекла дека сè уште верува во шансите за преговори, враќање на мирот, безбедноста и демократијата.