Во поткаст емитуван денес на Фејсбук, унгарскиот министер за надворешни работи Петер Сијарто ги коментираше тврдењата дека Белата куќа го разгледува главниот град на Унгарија, Будимпешта, како место за можна трилатерална средба меѓу американскиот претседател Доналд Трамп, рускиот претседател Владимир Путин и украинскиот претседател Володимир Зеленски
Унгарија веќе двапати понуди да биде домаќин на мировни преговори меѓу Русија и Украина и таа понуда сè уште важи, изјави унгарскиот министер за надворешни работи Петер Сијарто.
Во поткаст емитуван денес на Фејсбук, тој ги коментираше тврдењата дека Белата куќа го разгледува главниот град на Унгарија, Будимпешта, како место за можна трилатерална средба меѓу американскиот претседател Доналд Трамп, рускиот претседател Владимир Путин и украинскиот претседател Володимир Зеленски.
„Доколку е потребно, ние сме подготвени да обезбедиме соодветни, фер и безбедни услови за такви мировни преговори. Среќни сме ако можеме да придонесеме за успехот на мировните напори“,
рече Сијарто, пренесува Ројтерс.
Инаку, пред неколку дена „Политико“ објави дека американската тајна служба се подготвува за самит во Унгарија, а Будимпешта се појавува како прв избор на Белата куќа.
Сепак, министерот за надворешни работи ги негираше медиумските извештаи дека Трамп го поканил унгарскиот премиер Виктор Орбан да разговара за пристапувањето на Украина во Европската Унија по самитот со украинскиот претседател и европските лидери што се одржа во понеделникот во Белата куќа.