Коментирајќи ја изјавата на Путин од прес-конференцијата во Пекинг, каде што го покани Зеленски на разговори во руската престолнина, Сибиха нагласи дека постојат голем број алтернативни и сериозни опции. Тој посочи дека најмалку седум земји изразиле подготвеност да бидат домаќини на мировен самит меѓу Украина и Русија
Украинанскиот министер за надворешни работи Андриј Сибиха остро реагираше на предлогот на рускиот претседател Владимир Путин да се сретне со Володимир Зеленски во Москва, нарекувајќи го „неприфатлив“.
Коментирајќи ја изјавата на Путин од прес-конференцијата во Пекинг, каде што го покани Зеленски на разговори во руската престолнина, Сибиха нагласи дека постојат голем број алтернативни и сериозни опции. Тој посочи дека најмалку седум земји изразиле подготвеност да бидат домаќини на мировен самит меѓу Украина и Русија.
Меѓу заинтересираните земји се Австрија, Ватикан, Швајцарија, Турција и трите земји од Персискиот Залив.
„Ова се сериозни предлози и претседателот Зеленски е подготвен за таков состанок во секое време. Сепак, Путин продолжува со презентирање намерно неприфатливи предлози“,
напиша Сибиха на социјалната мрежа Икс.
Right now, at least seven countries are ready to host a meeting between leaders of Ukraine and Russia to bring an end to the war. Austria, the Holy See, Switzerland, Türkiye, and three Gulf states.
— Andrii Sybiha 🇺🇦 (@andrii_sybiha) September 3, 2025
These are serious proposals and President Zelenskyy is ready for such a meeting… pic.twitter.com/b19VquSEFU
Украинскиот шеф на дипломатијата заклучи дека „само зголемениот притисок може да ја принуди Русија конечно сериозно да се посвети на мировниот процес“.
Инаку, рускиот претседател Владимир Путин изјави дека е подготвен да се сретне со својот украински колега Володимир Зеленски во Москва. Тој нагласи дека „никогаш не ја исклучил“ средбата со Зеленски, но праша дали има „некаква смисла“ во таков состанок.
Путин, исто така, посочи дека Русија би можела да испрати повисок претставник за идните разговори со Украина.
Овој развој на настаните следува по низа дипломатски активности без конкретен напредок. Рускиот министер за надворешни работи Сергеј Лавров минатиот месец рече дека средбата меѓу Путин и Зеленски може да се одржи само откако ќе се подготви детален план за разговорите.
Можна средба меѓу Путин и Зеленски најави и американскиот претседател Доналд Трамп, откако во август разговараше телефонски со неговиот руски колега. Овој разговор дојде по средбата што Трамп ја имаше со украинскиот претседател Володимир Зеленски и европските лидери, а која следуваше по билатералната средба меѓу Трамп и Путин што се одржа на Алјаска.