Водечките американски медиуми во саботата го прогласија демократскиот кандидат Џозеф Бајден за новоизбран претседател на САД
Претседателот Доналд Трамп и натаму одбива да ги признае резултатите што досега се познати, и најавува жестока правна битка во која тврди дека ќе победи
Во Стејт департментот пристигнале многу пораки и честитки за новоизбраниот претседател на САД, Џо Бајден, но администрацијата на актуелниот претседател Доналд Трамп го блокира пристапот до нив, велат добро информирани официјални лица во американското Министерство за надворешни работи, јави Си-ен-ен.
Традиционално, Стејт департментот ги поддржува сите комуникации на новоизбраниот претседател, поради што многу земји започнаа да испраќаат пораки до Стејт департментот за време на викендот.
Но, со оглед на тоа дека администрацијата на Трамп му го забранува пристапот на Бајден до државните ресурси затоа што Доналд Трамп одбива да ја прифати неговата победа, десетици нови пораки сè уште не се доставени до вистинскиот примател.
Тимот на Бајден бил во контакт со странски влади без вклучување на Стејт департментот, а тој веќе имал неколку телефонски разговори со светските лидери, вклучувајќи ги германската канцеларка Ангела Меркел и канадскиот премиер Џастин Трудо.
Меѓутоа, тие работат без логистичка и преведувачка поддршка, која ја обезбедува оперативниот центар на Стејт департментот.
„Тие повеќе би сакале да ги користат ресурсите на Стејт департментот“,
изјавил извор добро упатен во ситуацијата истакнувајќи дека тимот на Бајден наишол на неочекуван предизвик кога станува збор за организирање телефонски повици.
Бајден, исто така, не ги добива брифинзите на разузнавачките служби, што е вообичаена пракса во САД откако ќе биде избран нов претседател, поради што, според безбедносни извори, се става под ризик националната безбедност, објави Си-ен-ен.
Водечките американски медиуми во саботата го прогласија демократскиот кандидат Џозеф Бајден за новоизбран претседател на САД.
Претседателот Доналд Трамп и натаму одбива да ги признае резултатите што досега се познати, и најавува жестока правна битка, во која тврди дека ќе победи, бидејќи поседува докази за непрваилности и кражба на гласови во клучните држави кои одлучуваат за победата.
Една од нив е и Џорџија, каде што според американските медиуми, по 99 проценти обработени гласачки ливчиња, мала предност има Бајден со 49,5 проценти, а сегашниот претседател на САД, републиканецот Доналд Трамп, 49,2 проценти. Затоа вчера локалните власти донесоа одлука за пребројување на сите гласачки ливчиња за претседателските избори во оваа држава.