Минатата година осомничениот објавил книга во која ги опишал своите напори да ја поддржи Украина во војната против Русија. Во неа напишал дека се обидел да се пријави за учество во војната во Украина, но бил одбиен на границата меѓу Полска и Украина. Пишувал и за политичките ситуации во Авганистан, Тајван и Северна Кореја
Осомничениот за обидот за атентат на поранешниот американски претседател и републикански кандидат Доналд Трамп, кој е идентификуван како Рајан Весли Рут (58), е приведен, објави Си-ен-ен. Мажот, според медиумски написи, бил сопственик на мала градежна компанија на Хаваи.
Според Си-ен-ен, Рут бил проукраински активист и силен поддржувач на Украина.
По стартот на целосната руска инвазија во 2022 година, Рут отпатувал во Украина. Присуствувал на митинг за поддршка на украинските војници на 1 мај 2022 година и ја посетил истата локација околу шест недели подоцна, каде што се фотографирал покрај знамето на Украина. Во видео објавено во април 2022 година, осомничениот го нарекол рускиот претседател Владимир Путин „терорист“ и рекол дека треба да му се стави крај.
Во десетици објави на социјалните мрежи во 2022 година изразувал поддршка за Украина.
Во нив пишувал дека е подготвен да умре во војната и дека Кремљ треба да се запали. Преку својот профил на Фејсбук ги охрабрувал странците да учествуваат во војната. Од октомври 2023 година се обидел да ангажира авганистански регрути претставувајќи се себеси како врска со украинската влада.
Претставник на украинската Легија на странци во изјава за Си-ен-ен потврдил дека Рајан Весли Рут контактирал со нив неколкупати, но дека никогаш не бил дел од воената единица во која се борат волонтери од странство.
„Оваа личност контактираше со нас преку интернет повеќепати. Ни нудеше голем број регрути од различни земји, но ни беше очигледно дека неговите понуди не беа реални. Не ни одговоривме, немаше на што да одговориме. Тој никогаш не беше дел од Легијата и не соработуваше со нас на кој било начин“.
изјави за Си-ен-ен, Олександр Шагури, офицер на Одделот за координација на странци при командата на копнените сили.
Што друго е познато за осомничениот за обидот за атентат на Трамп
Рајан Весли Рут (58) минатата година објавил книга во која ги опишал своите напори да ја поддржи Украина во војната против Русија. Во неа напишал дека се обидел да се пријави за учество во војната, но бил одбиен на границата меѓу Полска и Украина. Пишувал и за политичките ситуации во Авганистан, Тајван и Северна Кореја.
Бил чест критичар на Трамп на социјалните мрежи.
Според досегашните информации што ги пренесуваат локалните медиуми, Рут имал криминално досие. Бил обвинет за многубројни кривични дела во округот Гилфорд во Северна Каролина помеѓу 2002 и 2010 година. Прекршоците вклучуваат носење скриено оружје, отпор при апсење од полицаец, возење со одземена возачка дозвола, поседување украден имот.