Во прилогот се раскажува за посетата на Пендаровски во домот на Ембла, средбата со нејзиното семејството, со кое разговорал за предизвиците со кои се соочуваат и за решенијата и дека на девојчето му однел подароци
Претседателот Стево Пендаровски во понеделникот ја однесе 11-годишната Ембла Адеми до училиштето во кое таа учи. Ембла е девојче со Даунов синдром, а во јавноста за неa се слушна откако медиумитe објавија дека родителите на нејзините соученици одбиваат да ги пратат децата на училиште се додека таа е со нив во училница. Овој гест на претседателот Пендаровски наиде на позитивни коментари во јавноста, а беше поздравен од организациите за заштита на човековите права.
Денеска за ова сторија објави и светската ТВ мрежа Си-ен-ен, под наслов: „11-годишно девојче со Даунов синдром било малтретирано, претседателот на државата ја однесе на училиште“.
Во текстот се пренесува изјавата на портпаролот на Претседателот, според која Пендаровски ја држеше за рака Ембла Адеми додека одеа до нејзиното основно училиште во Гостивар, со објаснување дека Ембла била жртва на малтретирање во училиштето, бидејќи е дете со Даунов синдром – генетска состојба која предизвикува пречки во учењето и здравствени проблеми.
Понатаму, се раскажува за посетата на Пендаровски во домот на Ембла, средбата со нејзиното семејството, со кое разговорал за предизвиците со кои се соочуваат и за решенијата и дека на девојчето му однел подароци.
„Претседателот рече дека е неприфатливо однесувањето на оние кои ги загрозуваат правата на децата, особено кога станува збор за деца со нетипичен развој. Тие не само што треба да ги уживаат правата што ги заслужуваат, туку и да се чувствуваат рамноправни и добредојдени во училишните клупи и училишниот двор. Тоа е наша обврска, како држава, но и како поединци, а клучен елемент во оваа заедничка мисија е емпатијата. Тоа ќе им помогне на децата како Ембла, но исто така ќе ни помогне да научиме од нив како искрено да се радуваме, да споделуваме и да бидеме солидарни“,
го пренесува Си-ен-ен соопштението од Кабинетот на претседателот, додавајќи дека на видеото што го споделија од кабинетот на Пендаровски, се гледа како претседателот седи со семејството на Ембла и ѝ дава подароци, а потоа ја поздравува пред училишната капија додека таа влегува во училиштето.