За настанот се известени и претседателот Џо Бајден и потпретседателката и кандидатка за претседател од Демократската партија, Камала Харис, која на социјалните мрежи по инцидентот напиша дека во САД нема простор за насилство
Едно лице е приведено во денешниот инцидент пред голф-клубот на републиканскиот кандидат за претседател, Доналд Трамп. Иако претходно „Њујорк тајмс“ објави дека Трамп не бил целта на лицето што пукало, Си-ен-ен, повикувајќи се на свои извори кои се запознаени со истрагата, објави дека целта на вооруженото лице што отворило оган бил токму поранешниот претседател Доналд Трамп.
Веднаш по пукањето, припадници на Тајната служба возвратиле со оган, а шерифот на областа Мартин Каунти, која се наоѓа северно од голф-клубот на Трамп, објави дека едно лице е осомничено дека има поврзаност со настанот и е приведено откако неговото возило било запрено на автопатот во близина на областа.
За настанот се известени и претседателот Џо Бајден и потпретседателката и кандидатка за претседател од Демократската партија, Камала Харис, која на социјалните мрежи порача дека во САД нема простор за насилство.
I have been briefed on reports of gunshots fired near former President Trump and his property in Florida, and I am glad he is safe. Violence has no place in America.
— Vice President Kamala Harris (@VP) September 15, 2024
Од Белата куќа потврдија дека се информирани за настанот и оти ќе го следат развојот на случајот.
Претходно, портпаролот на кампањата, Стивен Чеунг, изјави дека Трамп е безбеден.
„Претседателот Трамп е безбеден по истрелите во неговата близина“,
изјави Чеунг.
На 13 јули годинава поранешниот американски претседател и кандидат за нов мандат Доналд Трамп преживеа обид за атентат на митинг во Батлер, Пенсилванија. Атентаторот, 20-годишниот Томас Метју Крукс од Бетел Парк, Пенсилванија, беше ликвидиран на самото место од страна на агентите на Тајната служба откако претходно тој испука неколку куршуми од кои еден заврши во увото на Трамп, а друг усмрти еден симпатизер кој беше позициониран на платото зад бината на која се наоѓаше поранешниот претседател.