„Руските акции се неприфатливи и покажуваат недостаток на почит кон нашиот територијален интегритет. Го следевме целиот ланец на настани и бевме на место да интервенираме“, изјавил началникот на шведските воздухопловни сили Јонас Викман
Руски воен авион вчера го нарушил шведскиот воздушен простор источно од балтичкиот остров Готланд, поради што биле активирани два борбени авиони на шведската армија, соопштија денеска вооружените сили на земјата, пренесува „Гардијан“.
Островот Готланд се наоѓа на помалку од 350 километри од руската ексклава Калининград, посочува британскиот весник.
Според соопштението, шведските вооружени сили првин испратиле предупредување до рускиот авион од типот „сухој су-24“, но откако не добиле повратен одговор, активирале два ловци „грипен“ за да го пресретнат.
„Руските акции се неприфатливи и покажуваат недостаток на почит кон нашиот територијален интегритет. Го следевме целиот ланец на настани и бевме на место да интервенираме“,
изјавил началникот на шведските воздухопловни сили Јонас Викман.
Ryskt stridsflygplan kränkte svenskt luftrum – avvisades av JAS 39 Gripen – Försvarsmakten https://t.co/qrRLv2BI77
— Försvarsmakten (@Forsvarsmakten) June 15, 2024
За потсетување, Шведска во март годинава официјално стана 32. земја членка на НАТО, што беше значаен момент за историски воено неутралната земја. Шведска, заедно со Финска аплицираа за членство во Алијансата по воената агресија на Русија врз Украина. Едно од главните начела на НАТО е дека напад на една земја-членка претставува напад на целиот сојуз.
Минатата недела и Министерството за одбрана на Финска соопшти дека покренало истрага поради сомневања дека руски воен авион го нарушил нејзиниот воздушен простор, летајќи околу 2,5 километри во внатрешноста на оваа нордиска земја, пишува „Гардијан“.
Според Министерството, нарушувањето на воздушниот простор траело околу две минути. Министерот за одбрана на земјата, Анти Хаканен во врска со случајот предупердил дека Финска, која стана членка на НАТО во април лани, ги сфаќа сериозно наводите за повреда на својот воздушен простор.