Во објавата на Фејсбук од Иницијативата „Учебници и настава мора да има“ која најави и референдум, го објави дописот што го добиле од Собранието потпишан од претседателот Талат Џафери во кој се вели дека Предлогот на закон за учебници и други наставни и дидактички материјали во основното и средното образование е повлечен
Од МОН не коментираат дали тој е повлечен или не, туку велат дека наставата за учениците од прв и четврто одделение од 1 септември ќе биде според новата концепција
Од Владата за утре најавуваат објаснување
Наставата за првоодделенците и за четвртоодделенците од први септември ќе тече по новата Концепција, со новите материјали за учење за што сме сигурни дека ќе дадат подобри резултати кај учениците, велат од Министерството за образование и наука, во соопштение кое следи откако претходно Иницијативата „Учебници и настава мора да има“ кое се противат на воведувањето дигитални учебници објавија дека Предлог- законот за учебници и други наставни и дидактички материјали во основното и средното образование е повлечен од Собранието.
Во објавата на Фејсбук од оваа иницијатива која најави и референдум, го објави дописот што го добиле од Собранието потпишан од претседателот Талат Џафери во кој се вели:
„Ве известувам дека Владата на Република Северна Македонија со допис заведен под број 08-2167/3 од 30 јуни 2021 година, ме извести дека Предлогот на закон за учебници и други наставни и дидактички материјали во основното и средното образование, примен и заведен во Собранието на 29 април 2021 година под број 08-2167/1 го повлекува“.
Врз основа на ова од Иницијативата велат дека ја добиле битката и со тоа не е потребно одржување на референдум.
На ова реагираа и од ВМРО-ДПМНЕ.
„Денес Министерството за образование и наука со повлекувањето на Предлог законот за учебници и други наставни и дидактички материјали во основното и средното образование ги потврди нашите тврдења дека тоа што го нудеше Мила Царовска не е дигитализација, туку само дигитални учебници на начин за кој нема друг пример во цивилизираниот свет…Во услови на пандемија дрско се обидоа Концепцијата да ја протуркаат на сила, а реформите на власта пробуваат насила да ги спроведат на неподготвени наставници. Да се менува на ваков радикален начин концептот на учење преку исфрлање на хартиените учебници и на таков перфиден начин, учениците да немаат печатени и хартиени учебници, претставуваше безумие кое несомнено мораше да заврши на ваков начин. Граѓанската иницијатива ‘Учебници и настава мора да има’ го покажа полниот дух на граѓанските слободи и права, ова е победа на разумот и на вистината!“,
напиша Иванка Василевска на Фејсбук.
Но вечерва од МОН во соопштението велат дека реформата во основното образование почнува со новата учебна година во прво и четврто одделение, за што се прават сите потребни подготовки, според планот и утврдената динамика.
„Наставните програмите се веќе донесени. Во постапка е набавката на 10 илјади таблети. Тече подготовката на материјалите за учење за прво одделение кои треба да се готови до крајот на јули, а првата половина на август првите дигитални учебници треба да бидат сосема готови и да се дистрибуираат до училиштата. Дополнително се набавуваат кабинети за природни науки за 265 училишта. Овие кабинети се за погорните одделенија, но важно е училиштата да се подготвени за имплементацијата на реформскиот процес кој ќе се спроведува во следните 5-6 години“,
се вели во соопштението од МОН во кое ниту се потврдува ниту се демантира дека Владата го повлекла од собраниска процедура предлог-законот.
Од Владата за „Прес 24“ потврдиле дека предлог-законот за учебници и други наставни и дидактички материјали во основното и средното образование е повлечен од Собранието и за утре најавуваат дека ќе ги соопштат причините.