Силно го поддржувам почетокот на преговорите со Република Северна Македонија и Албанија, повтори германскиот канцелар, Олаф Шолф, во Софија, каде замина по неколкучасовната официјална посета на Скопје утрово.
Шолц во Софија истакна дека Германија разбира дека не е лесно да се надминат историските проблеми, но порача дека преговорите мора да продолжат до крајот на француското претседателство.
„Носиме одговорност за стабилноста на Балканот. Наша задача е да не ги уриваме надежите“,
порача канцеларот.
Според Шолц, Северна Македонија треба да има сигурна европска перспектива, но и треба да ги исполни сите услови.
„РСМ и Бугарија веќе се подготвени да тргнат по овој пат. Постои големо општо разбирање за тоа како треба да функционираат работите. Проблемот е како да стигнете таму. Важно е да разговараме и да вложиме енергија во справувањето со овие прашања. Никогаш не се знае каков ќе биде исходот. Но, бидејќи сите парламенти и шефови на влади знаат дека носат одговорност, верувам дека ќе постигнеме напредок“,
порача Шолц.
Бугарскиот премиер, Кирил Петков, потврди дека тема на разговор со канцеларот било и македонското прашање.
„Се разговараше и за темата РСМ. Ние се договоривме дека двете влади ќе продолжат со работа, а бугарската влада јасно го кажа ставот на Бугарија за условите што мора да се случат за да се оди напред“,
рече Петков.