Тој посочи дека обезбедувањето германски крстосувачки ракети „Таурус“ за Киев ќе доведе до голем ризик од ескалација на конфликтот
Германскиот канцелар Олаф Шолц вчера ја отфрли можноста неговата земја да ѝ обезбеди на Украина прецизно оружје со долг дострел, без оглед на одлуките донесени од сојузниците на НАТО, јави агенцијата ДПА.
На собир со граѓани во Пренцлау во источногерманската покраина Бранденбург, Шолц го повтори своето противење на испораката на крстосувачки ракети „Таурус“, велејќи дека тоа би значело висок ризик од ескалација на украинскиот конфликт.
Ракетите „Таурус“ имаат дострел од околу 500 километри и би можеле да се користат за напад врз Москва од украинска територија.
„Реков не“,
нагласи Шолц додавајќи оти тоа важи и за другите оружја.
Тој посочи дека нема да го промени својот став дури и ако другите земји одлучат да постапат поинаку.
Претседателот на Украина, Володимир Зеленски, бара од сојузниците на Украина да ѝ обезбедат оружје со долг дострел за да може да ги нападне руските логистички и воени аеродроми лоцирани далеку зад линијата на фронтот, дури и на руска територија.
Оружјето со најдолг дострел што Германија досега го испрати во Киев е ракетниот фрлач „Марс II“, кој може да погоди цели на оддалеченост од 84 километри.
САД, Велика Британија и Франција испратија крстосувачки ракети во Украина со дострел до 300 километри.
Во моментов е во тек дебата за тоа дали да се одобри употребата на ова оружје против цели на руска територија. САД и Велика Британија се двоумат околу оваа одлука, а Русија веќе се закани дека таквата одлука ќе значи директен конфликт меѓу НАТО и Русија.