Секоја идеја и концепт што оди во насока на креирање широк фронт на политички партии што ќе се најдат на страната на поддршка и на клучните реформи, брзото зачленување на Северна Македонија во ЕУ и отстранување на сите бариери на тој пат, е нешто за што вреди да се размисли, одговори вицепремиерот на прашањето дали се работи на формирање широка предизборна коалиција во која би влегле сите партии освен ВМРО-ДПМНЕ и Левица
Лидерот на ДУИ, Али Ахмети, од новогодишниот прием на партијата неодамна порача: „Да размислиме повеќе за создавање фронт за европска Македонија, да не се делиме на Албанци и Македонци, туку да се охрабриме и да го тргнеме стравот едни од други“
Вицепремиерот за европски прашања, Бојан Маричиќ, во емисијата „360 степени“ на ТВ Алсат, прашан дали се работи на формирање широка предизборна коалиција во чиј состав би влегле сите партии освен ВМРО-ДПМНЕ и Левица, рече дека сè што оди во насока на креирање широк фронт на политички партии што ќе се најдат на страната на поддршка за брзо зачленување на Северна Македонија во ЕУ, е вредно за размислување.
За идејата за широка предизборна коалиција извесно време се зборува во политички кругови, а јавно ја актуелизира лидерот на ДУИ, Али Ахмети, на новогодишниот прием на партијата на 22 декември.
„Да размислиме повеќе за создавање фронт за европска Македонија, да не се делиме на Албанци и Македонци, туку да се охрабриме и да го тргнеме стравот едни од други. Овој фронт мора да се изгради и јас и вие заедно го имаме моралното и националното право тоа да го направиме за политичките партии, затоа што Македонија мора да биде европска бидејќи историски и територијално ѝ припаѓа на Европа“,
порача тогаш Ахмети.
Маричиќ вели дека СДСМ е голема, сериозна и одговорна партија која има јасна цел и план, а тоа е фокусирање на европскиот концепт и пат. Затоа, рече тој, секоја идеја и концепт што оди во насока на креирање широк фронт на политички партии што ќе се најдат на страната на поддршка и на клучните реформи, брзото зачленување на Северна Македонија во ЕУ и отстранување на сите бариери на тој пат, е нешто за што вреди да се размисли.
„Тоа е водилка на СДСМ во последниве шест години, а и пред тоа било така. Затоа, мислам дека сите овие идеи што имплицираат окрупнување на фронтот за европска Македонија и на фронтот што треба да ги носи промените, а фронтот треба да биде отворен за сите оние што искрено веруваат во европска иднина на Северна Македонија, треба да го оставиме како тема на размислување и концепт на размислување“,
кажа Маричиќ.
Прашан дали ваква предизборна коалиција би можела да биде дискредитирана на македонско-албанска линија, Маричиќ вели дека Владата во изминатите шест години направила многу за надминување на разликите и зголемување на кохезијата во државата. Според него, секоја евентуална поделба по етничка линија е штетна и трајно ќе ја разори државата.
„Наша должност е да не го делиме општеството на етнички граници и линии туку да воспоставиме таква кохезија што ќе функционира во пракса, особено кога се работи за исполнување на најврвните приоритети, а тоа е членството во Европска Унија. Замислете да се доведеме до ситуација во која би биле поделени по етничка линија, а многу работеа на тоа и ВМРО-ДПМНЕ и Левица минатото лето за да се направи дистинкција по етничка линија на луѓето во однос на ставот кон Бугарија и генерално кон ЕУ“,
вели Маричиќ.
За тоа дали ако идејата за широка предизборна коалиција подразбира и учество на Алијанса за Албанците, тоа би значело дека оваа партија сега би влегла во Владата како подготовка за таков чекор, Маричиќ вели дека е премногу рано и не би сакал да шпекулира за оваа тема.
„Ова се само идеи за кои е вредно да се разговара и да се размислува, за сите луѓе кои се споменаа, а како ќе се реализираат и дали ќе се реализираат, останува на политичките лидери“,
кажа Маричиќ.
Маричиќ не сакаше директно да одговори дали Алијанса за Албаниците ќе влезе во Владата, но рече дека постоела подготвеност и идеи, а дали тоа ќе се случи во следниот период ќе зависи од разговорите и волјата на политичките лидери.
На прашање како би стигнале до 80 пратеници, со оглед на тоа што дури и со евентуална широка предизборна коалиција би биле далеку од двотретинско мнозинство во Собранието, вицепремиерот одговори дека, според него, прво треба да се направат уставните измени, а потоа да се оди на избори, бидејќи, во спротивност, единствена тема на изборите би бил токму ставот кон Бугарија.
„Знаеме точно која партија како ќе се позиционира. Знаеме дека ВМРО-ДПМНЕ ќе презентира една нереална слика, бајковита слика која може и да им се допадне на граѓаните, според која ќе вели дека тие ќе се обидат да издејствуваат подобар договор со Бугарија, но ние знаеме дека во нивно време преговараа и не успеаја да најдат подобар договор. Второ, навистина се обидувавме последниве три години по сите основи да добиеме најдобар договор и спорот со Грција ни докажа дека чекањето подобар договор и подобра понуда секогаш ни носи полоша позиција“,
вели вицепремирот Маричиќ.
Според вицепремиерот, не е можна промена на Преговарачката рамка за Северна Македонија усвоена од Советот за општи работи на ЕУ.
*Повеќе вести од гостувањето на Маричиќ во „360 степени“:
- Маричиќ е оптимист дека до ноември ќе ја убедат ЕУ да ги одложи новите правила за патување
- Маричиќ: Не знам за формален обид на Заев за уривање на Ковачевски
- Ако годинава не ги завршиме уставните измени, Албанија сама ќе напредува кон ЕУ, вели Маричиќ