Градоначалникот на Скопје Петре Шилегов одговарајќи на новинарски прашање рече дека неговиот став за дислоцирање на спомениците од „Скопје 2014“ останува непроменет, а идејата која му се допаѓа нему е статуите да се соберат во еден парк, кој би можел да се направи на местото на отстранетата дива депонија во Ѓорче Петров.
Затоа ги повика и Министерството за култура и Општина Центар да работат заедно и координирано.
„Мора да бидеме внимателни, да не предизвикуваме нов револт во општеството. Македонското општество е сериозно поделено, треба да внимаваме и да покажеме меѓусебна почит независно од тоа дали му се допаѓа на некого или не. Скопје не е град каков што е сега во центарот, ниту бил, ниту треба да биде, ниту ќе биде, но од друга страна, мораме да ги почитуваме да им овозможиме на некои луѓе кои сакаат, тоа да може и да го гледаат. Да не бидеме брутални во отстранувањето. Тоа нешто го има направено Унгарија. Сите статуи на Сталин и обележја на комунизмот ги имаат ставено во еден парк, зошто да не го направиме и ние тоа со оставината од нашиот мал диктатор“,
рече Шилегов алудирајќи на експремиерот Никола Груевски.
Тој зборуваше и за постапката за отстранување на галиите од реката Вардар во центарот на Скопје и рече дека во тек е жалбена постапка пред судот.
„Во тек е жалбената судска постапка од страна на должниците за да знаеме на што сме кога се галиите во прашање, моето мислење е дека тие треба да се дислоцираат. Создадени се правните услови и ние ја почнавме постапката преку надлежен извршител, но правата кои ги имаат странките во постапката не можеме и не треба да ги загрозуваме“,
рече Шилегов.