Се бара разрешување на министерот за внатрешни работи, на директорот на безбедносно-информативната агенција и на членови на Советот на Регулаторното тело за електронски медиуми
Пред зградата на српското Собрание, белграѓани се собираат на шестиот по ред „Протест против насилството“.
Протестите се одржуваат по двете масовни убиства што ја потресоа Србија на почетокот од минатиот месец, а насобраните бараат одговорност од владата за начинот на кој реагирала на трагедиите, како и за атмосферата на насилство во општеството.
Се бара разрешување на министерот за внатрешни работи, на директорот на безбедносно-информативната агенција и на членови на Советот на Регулаторното тело за електронски медиуми.
Тие исто така бараат укинување на националните фреквенции за телевизиите чии програми промовираат насилство и затворање на таблоидите кои ги прекршуваат етичките кодекси и шират лажни вести.
Како што е најавено, демонстрантите како и досега ќе се соберат пред Собранието на Србија, потоа ќе пешачат речиси три километри и ќе ја обиколат владата, околу која ќе направат обрач и ќе остават пораки до претставниците на државата.
Првиот протест „Србија против насилството“ се одржа на 8 мај, а на 12 мај граѓаните два часа го блокираа мостот „Газела“ на вториот протест. Третиот протест се одржа на 19 мај, кога беа блокирани „Газела“ и Бранков мост. Четвртиот се одржа на 27 мај, а по прошетката учесниците направија круг околу зградата на РТС. За време на петтиот протест минатата сабота, учесниците по прошетката формираа обрач околу зградата на Претседателството.