Нашите обврски ги завршивме, но има работи што не зависат од нас, вели министерката за одбрана
Не можеме да очекуваме дека без преговарач од другата страна и со техничка влада е можен пресврт, смета министерката за одбрана Радмила Шекеринска, на прашањето какви се очекувањата од јунскиот Самит на ЕУ во однос на позицијата на нашата земја, имајќи го предвид ставот на Бугарија.
Шекеринска вели дека не можеме ниту да ја избереме бугарската влада ниту преговарачот од другата страна и поради тоа, она на што не можеме да влијаеме, погрешно е да се прогнозира. Но, смета дека она што можеме да го правиме до јуни е да ги потсетуваме сите дека ние сме ги исполниле нашите обврски и дека очекуваме ист тип посветеност и доследност од ЕУ.
„Во изминатиот период се покажа дека едно правило важи – заврши го твоите работи за да не може да се каже дека од твоите пропусти работата не е завршена. Сите извештаи за реформите покажуваат дека клучните прашања поради кои тапкавме во место, како демократските процеси, човековите права, слободата на медиумите и владеењето на правото, секаде има напредок. Но, има и работи што не зависат од нас“,
рече Шекеринска.