Министерката за одбрана Радмила Шекеринска вели дека декретот на американскиот претседател Џозеф Бајден покажува дека интересот на САД, еден од нашите најблиски сојузници, за Западниот Балкан не е изгубен туку, напротив, се зајакнува.
Шекеринска, одговарајќи на новинарско прашање во врска со наредбата на Бајден за конфискација на имот и забрана за влез во САД на лица кои се закана за безбедноста на Западен Балкан, вели дека се испраќаат две пораки, а тоа е дека договорите кои обезбедија решение за проблемите на Балканот се влог во безбедноста на Балканот и дека од сите земји во поширокиот регион очекуваат силна борба против корупцијата.
„Сите нив, меѓу кои и Преспанскиот договор, САД ги доживуваат, ги толкуваат и ги сметаат за гаранција за безбедноста и стабилноста на овој регион. Втората порака е дека не е доволно само да ги решавате политичките проблеми, туку дека од сите земји во поширокиот регион очекуваат силна борба против корупцијата. Мислам дека и двете пораки кои ги испраќаат САД се добредојдени за сите нас кои посакуваме да живееме во подобар регион, кој не е само дел од евроатлантското семејство и НАТО, туку е дел од една евроатлантска култура на владеење на право, на демократски вредности, слободни медиуми, кои носат просперитет“,
изјави Шекеринска.
Проблеми со декретот, нагласи таа, може да имаат само оние што ловеа во матно и се трудеа или се трудат да ја дестабилизираат државата.
„Јасна е пораката дека ангажманот ќе продолжи и дека тој ангажман нема да биде само зад затворени врати, туку ќе биде експлицитен и јавен“,
нагласи Шекеринска.