Армијата и нејзините припадници покажаа дека секогаш и секаде се први да одговорат на барањето на граѓаните и на државата, да се вложат со целиот капацитет, со целото знаење, со целата нивна опрема за да спасат прво човечки животи, а потоа да ги спасат и материјалните добра и природните добра на државата, изјави министерката за одбрана, Радмила Шеќеринска.
„Ангажирани беа и сè уште се сите капацитети на Армијата, човечкиот потенцијал и нашите воздухоплови за кои во ниту еден момент практично немаше простор за одмор. Ангажирани се пешадиски единици од Командата за операции, Првата бригада, специјалните сили и целосно беа ангажирани припадниците и воздухопловите на воздухопловниот ВИНГ“,
потенцира Шеќеринска.
Таа појасни дека во моментов 1 614 припадници се ангажирани и додаде дека оваа бројка постојано се менува. Над илјада припадници на Армијата секојдневно се во фаза на приправност, а во просек дневно помеѓу 250 до 400 војници со целосна опрема, механизација и летала беа ставени на располагање на цивилните институции за да помогнат. Според Шеќеринска, ова е најголемата бројка на човечка сила која што се вклучи во гасењето на пожари.
„Повеќе од 80 прелети со над 650 тони исфрлена вода, беспоштедно, без резерви, без калкулации, Армијата излезе и за своите граѓани и за својата држава“,
рече таа.
Министерката смета дека припадниците на Армијата заслужуваат највисоки оценки и пофалби за нивното херојство. Изрази благодарност за добиената помош од Словенија, Романија, Србија, Австрија, Бугарија…
Командантот на Воздухопловниот ВИНГ, полковник Стојко Пејовски, информираше дека заклучно со вчерашниот ден реализирани се огромен број летови, како на домашните, така и на странските хеликоптери и авиони вклучени во гаснењето на пожарите, при што се исфрлени 850 тони вода.
„Повеќе од 50 отсто од оваа реализација и 70 отсто припаѓа на нашите воздухоплови. Но, не е добро да работиме со конкретни бројки, имајќи предвид дека секој кој дошол тука да помогне при гасењето на пожарите, не дошол да ги мериме достигнувањата“,
рече тој.
Полковник Пејовски потенцира дека голем предизвик претставуваат и екстремно високите температури на воздухот што сега достигнуваат до 41 степен, но, како што нагласи, кога ќе влезете во воздухопловот таа температура се качува и до 60 степени.
Бригадниот генерал, Бесник Емини, информираше дека по барање на ЦУК, а по наредба на врховниот командант, Армијата активно се вклучила од 2 август во гасењето на пожарите, на располагање имало 1000 луѓе, а ангажманот бил вкупно на 12 локации на цела територија на државата, претежно на непристапен терен зафатен со пожар.
„Вкупно до денеска се ангажирани 1614 припадници од Командата за операции со потребна опрема, техника и три воздухоплови од нашиот состав. Во сите гарнизони од Армијата имаме подготвено сили и средства кои се во приправност и доколку е потребно може да бидат ставени во функција на терен веднаш“,
рече Емини.