Москва ги негираше обвинувањата од Пригожин, а руските државни медиуми објавија дека руските безбедносни служби отвориле кривична постапка против водачот на Вагнер обвинувајќи го за „повикување на вооружен бунт“
Шефот на руската платеничка паравоена група Вагнер, Евгениј Пригожин, ја обвини руската војска дека извршила напад врз неговите војниците. Тој тврди дека негови борци се убиени и ќе возврати со „марш за правдата“.
„Оние кои ги убија нашите момци и дестици илјади животи на руски војници (во војната во Украина) ќе бидат казнети“,
вели Пригожин во аудиоснимка што ја објави на социјалната мрежа Телеграм.
„Маршот за правдата“ што го најавува тој, според него, не е воен удар и на никој начин не ја попречуваат војската во активностите.
Ваквите обвинувања од Пригожин претставуваат и ескалација на внатрешните препукувања во Русија откако тој претходно го обвини рускиот министер за одбрана Сергеј Шојгу за започнување на војната во Украина.
Официјална Москва ги негираше тврдењата дека нападнала борци на Вагнер. Министерството за одбрана објави соопштение во кое наведе дека извештаите на Пригожин се неточни и претставуваат информативна провокација.
Руските државни медиуми контролирани од Кремљ, пак, објавија дека руските безбедносни служби отвориле кривична постапка против водачот на Вагнер обвинувајќи го за „повикување на вооружен бунт.
Групата Вагнер се бореше заедно со руските сили на бојното поле во Украина меѓутоа последните месеци критиките од Пригожин кон военото раководство во Москва стануваат се погласни.