Им благодарам на Боцвана и на ЈАР што толку брзо ја открија и пријавија оваа варијанта, но длабоко загрижувачки е што другите сега ги казнуваат тие земји затоа што ја направиле вистинската работа, вели Тедрос Гебрејсус
Шефот на Светската здравствена организација (СЗО), Тедрос Аданом Гебрејсус, изрази загриженост поради „претераната реакција“ на некои земји на појавата на варијантата омикрон, оценувајќи дека наметнатите ограничувања можеби не се неопходни и дека со нив неправедно се казнуваат африканските земји.
„Добро ја разбирам загриженоста на сите земји да ги заштитат своите граѓани од варијанта што сè уште не ја разбираме целосно. Подеднакво сум загрижен што некои земји-членки воведуваат поопшти мерки кои сами по себе не се засновани на докази или ефективни и само ќе ја зголемат нееднаквоста“,
додаде тој.
Првпат забележана во Јужноафриканската Република пред една недела, варијантата омикрон предизвика глобален аларм, доведе до забрана за патување и дополнително покажа разлика помеѓу масовната вакцинација кај богатите и ниското ниво на вакцинација о сиромашните земји.
Обраќајќи се на состанокт зад затворени врати, шефот на СЗО апелираше до 194 земји-членки да се придржуваат до „рационални и пропорционални“ мерки, се наведува на веб-страницата на СЗО.
„Сè уште има повеќе прашања отколку одговори за сериозноста на варијантата и ефективноста на вакцината“,
рече Тедрос.
Досега не се пријавени смртни случаи поради варијантата омикрон, иако СЗО вели дека таа варијанта на коронавирус претставува висок ризик за нагло зголемување на бројот на заразени.
„Уште еднаш им благодарам на Боцвана и на Јужноафриканската Република што толку брзо ја открија, секвенционираа и пријавија оваа варијанта. Длабоко загрижувачки е што другите сега ги казнуваат тие земји затоа што ја направиле вистинската работа“,
рече тој.