НАТО претходно ја предупреди Русија за нејзината нуклеарна реторика. Во март Алијансата го критикуваше Владимир Путин за, како што рече, неговата опасна и неодговорна нуклеарна реторика, еден ден откако рускиот претседател рече дека планира да постави тактичко нуклеарно оружје во Белорусија
Шефот на НАТО, Јенс Столтенберг, вели дека Алијансата не открила никакви промени во руските нуклеарни сили и не гледа причина да ги преиспита сопствените нуклеарни сили.
„Не видовме никакви промени во нивните нуклеарни сили што би нè поттикнале да ги промениме нашите сили и начинот на нивното распоредување. Досега не видовме ништо што го бара тоа од наша страна“, рече Јенс Столтенберг на конференцијата во Норвешка,
пишува „Скај њуз“.
НАТО претходно ја предупреди Русија за нејзината нуклеарна реторика. Во март Алијансата го критикуваше Владимир Путин за, како што рече, неговата опасна и неодговорна нуклеарна реторика, еден ден откако рускиот претседател рече дека планира да постави тактичко нуклеарно оружје во Белорусија.
Путин го спореди потегот со САД, што го стационираат своето оружје во Европа. Сепак, во мај шефот на американското разузнавање Аврил Хејнс рече дека е многу малку веројатно Русија да го искористи своето нуклеарно оружје.
Нуклеарните тензии меѓу Русија и САД се зголемија од почетокот на војната, а Путин постојано предупредуваше дека Русија е подготвена да го искористи својот нуклеарен арсенал, доколку е потребно, за да го одбрани својот територијален интегритет.
Во февруари, тој исто така објави дека Русија го суспендира своето учество во новиот договор СТАРТ, последниот преостанат договор за нуклеарно оружје со САД, кој го ограничува бројот на стратешки боеви глави што секоја страна може да ги распореди.