Зеленски вели дека потрагата по наследник ќе започне утре, а канцеларијата на претседателот на Украина, која ја водеше Јермак, ќе биде „реорганизирана“ како дел од процесот
Шефот на кабинетот на украинскиот претседател Володимир Зеленски, Андриј Јермак, поднесе оставка откако украинските антикорупциски агенции извршија претреси во неговиот стан.
Зеленски го потврди заминувањето на Јермак, кој ги водеше мировните преговори на земјата со САД.
Претседателот го пофали Јермак, но јасно стави до знаење дека „ништо не треба да го одвлече вниманието од одбраната на Украина“.
„Јермак ја поднесе својата оставка“,
рече претседателот.
Зеленски вели дека потрагата по наследник ќе започне утре, а канцеларијата на претседателот на Украина, која ја водеше Јермак, ќе биде „реорганизирана“ како дел од процесот, пишува „Гардијан“.
„Благодарен сум на Андриј што секогаш ја претставуваше позицијата на Украина во преговарачкиот процес точно онака како што треба. Тоа отсекогаш била патриотска позиција. Но, сакам да нема гласини или шпекулации“, рече Зеленски.
Украинските служби за борба против корупцијата од утрово спроведуваа истражни дејствија во канцелариите и домот на Андриј Јермак.
Националното биро за борба против корупција на Украина (НАБУ) и Специјалното обвинителство за борба против корупцијата (САПО) во заедничка изјава соопштија дека нивни екипи вршат овластени претреси поврзани со истрага. Во соопштението на двете служби не е конкретно наведено за каква истрага станува збор ниту, пак, се споменува шефот на кабинет на украинскиот претседател, но се наведува дека се вршат претреси во врвот на кабинетот на претседателот на Украина.
Во врска со акцијата се огласи самиот Андриј Јермак, кој во објава на социјалните мрежи потврди дека се вршат претреси во неговиот дом.
Новинската агенција Ројтерс претходно овој месец објави дека двете служби водат сеопфатна истрага за организирана шема на корупција во главната компанија за атомска енергија во Украина, каде што било земано мито од 100 милиони долари, а во која е вмешан и поранешен деловен партнер на претседателот Зеленски.