Според него, Бугарија останува посветена на сите елементи од европскиот консензус од 2022 година, чија имплементација, како што додава, е единствена можност за европска интеграција на соседната земја
Jа поздравуваме решеноста на Комитетот за надворешни работи (АФЕТ) на Европскиот парламент (ЕП) да не се вовлекува во шпекулативни националистички наративи поврзани со тврдења за „вековен македонски идентитет“, што се спротивни на европските вредности на инклузија и ги повредуваат чувствата на Бугарите и на претставниците на другите заедници во РСМ. Ова попладнево на својот фејсбук-профил го напиша шефот на бугарската дипломатија Георг Георгиев откако АФЕТ го усвои Извештајот за Северна Македонија за 2023 и 2024 година подготвен од австрискиот европратеник и известувач за земјава Томас Вајц, а во кој на неколку места има референци за признавање на македонскиот јазик и идентитет.
Георгиев посочува дека нивната загриженост во врска со политиките на Северна Македонија е поврзана со две клучни прашања:
- Гарантирање на правото на Бугарите во РСМ на самооопределување, без страв од прогон и дискриминација;
- Спречување провокации против милиони бугарски граѓани – граѓани на Европската Унија, од кои многумина се потомци на Бугари од географскиот регион Македонија.
Според него, Бугарија останува посветена на сите елементи од европскиот консензус од 2022 година, чија имплементација, како што додава, е единствена можност за европска интеграција на соседната земја. Оваа позиција, вели Георгиев, е потврдена со одлуките на Народното собрание во Софија од јуни 2022 година и мај 2025 година.
Георгиев вчера изјави дека извештајот на Европскиот парламент за напредокот на Република Северна Македонија нема меѓународно правнообврзувачка природа, како и дека ниту еден обид за заобиколување на консензусот за С Македонија од 2022 година нема да биде успешен, бидејќи ЕП нема надлежност да изразува мислење за прашања како што се идентитетот, јазикот и слични формулации.
По денешното гласање во Брисел, Вајц во изјава за „360 степени“ рече дека преговорите биле тешки и долги, но дека има јасно мнозинство што зборува само за себе.
„За“ извештајот на Вајц, заедно со компромисните амандмани, беа 40 европратеници, 19 беа „против“ и 10 „воздржани“.
На гласање не стигна амандманот што усно го предложи германскиот европратеник Михаил Галер од ЦДУ, односно од Европската народна партија, кој предложи пред „македонски јазик и идентитет” да се додаде терминот „модерен”. Шестмина се изјаснија против (требаше минимум петмина) што според правилата на ЕП значи дека за амандманот воопшто нема да се гласа.
Галер, кој е од групата на демохристијаните, рече дека имаат разбирање со групите Социјалисти и демократи, Обнова и Зелените, таков амандман да биде предложен и на пленарната седница на Европскиот парламент на која треба конечно да биде усвоен извештајот за Македонија. Сесијата е закажана од 7 до 10 јули во Стразбур.