Сепак, смета дека со навременото објавување на неговата одлука се докажува дека неговите намери се транспарентни и му дава доволно време на Европскиот совет да подготви непречена институционална транзиција, во европски интерес, по европските избори
Претседателот на Европскиот совет, Шарл Мишел, вечерва соопшти дека решил да ја повлече својата кандидатура за пратеник во Европскиот парламент на изборите во јуни и дека планира да го заврши целиот свој актуелен мандат, кој истекува во ноември.
„Нема да бидам кандидат на европските избори. Не сакам оваа одлука да не оттргне од нашата мисија или да ја поткопа оваа институција и нашиот европски проект, ниту да биде злоупотребена на кој било начин за да го подели Европскиот совет, кој верувам дека мора неуморно да работи за европското единство“,
напиша Мишел на својот Фејсбук профил.
Вели дека во политичкиот живот влегол пред триесет години, а оттогаш, учествувал на речиси сите избори во Белгија, на различни нивоа на власт, локално, провинциско и федерално.
„Во изминатите четири години служев како претседател на Европскиот совет, по одлука на 28-те шефови на држави или влади во 2019 година. Европа отсекогаш имала посебно место во моето срце. На нашиот европски проект му служев со страст и убедување речиси десет години, прво како белгиски премиер, а потоа и во мојата сегашна улога. Затоа ми се чинеше природно, како и секој лидер кој сака да продолжи да и служи на својата земја, да се ставам пред гласачите за да го промовирам и бранам европскиот проект. Тоа е исто така можност да ги објаснам и бранам одлуките во кои сум бил дел и да ја изложам мојата визија за предизвиците што доаѓаат: климата и дигиталните трансформации, работните места и просперитетот, пандемиите, војните во Украина и на Блискиот Исток, и многу други геополитички потреси. Европа не е поштедена од овие предизвици кои директно ги засегаат нашите граѓани. Застанувањето како кандидат, особено за претседател на Европскиот совет, е чин на одговорност – и ризик – насочен кон зајакнување на демократската легитимност на европскиот проект, од рамките на Европскиот парламент“,
вели тој.
Сепак, смета дека со навременото објавување на неговата одлука се докажува дека неговите намери се транспарентни и му дава доволно време на Европскиот совет да подготви непречена институционална транзиција, во европски интерес, по европските избори.
„Мојот избор предизвика до екстремни реакции – не во рамките на Европскиот совет, туку надвор од него – за изгледите за учество на европските избори, скратување на мојот мандат и продолжување на мандатот на мојот наследник за неколку месеци. Ги поздравувам сите политички критики и легитимни аргументи. Нормално, секоја ситуација има неколку можни гледишта. Секогаш ќе бидам жесток застапник на Европа која е демократска, силна, обединета и господар на сопствената судбина“,
вели Мишел.
Одлуката на Мишел да се повлече од трката за европратеник доаѓа на шест дена пред вонредниот Самит на шефовите на држави или влади на членките на ЕУ, на кој треба да се разговара за механизмот за финансиска поддршка за Украина.
Мишел на почеток на месецов соопшти дека ќе биде носител на листата на белгиското либерално Реформско движење (МР) на изборите за членови на Европарламентот од Белгија. Доколку беше избран за европратеник, Мишел по изборите ќе мораше да се повлече од местото претседател на Советот на ЕУ, што отвораше можност за две опции – неговиот наследник на оваа функција да биде избран уште во јуни или пак со Советот до ноември да раководи унгарскиот премиер Виктор Орбан, чија земја ќе претседава со Унијата во втората половина од годинава.