Тој им посочува на македонските власти итно да поднесат официјално барање за помош за жртвите да добијат специјализиран третман во најдобрите европски центри за изгореници
ФОТО: Фејсбук
Северна Македонија итно мора да побара европска помош за жртвите со изгореници, пишува Влад Војкулеску, поранешен министер за здравство во романската влада.
Војкулеску, кој сега е европратеник, бил министер за здравство од мај 2016 година, неколку месеци по трагичната несреќа во ноќниот клуб „Колектив“ во Букурешт, кој исто така се запалил поради употреба на пиротехнички средства на концерт, а загинале 64 лица.
„Ниту една земја во ЕУ – ниту една земја во светот – не може сама да се справи со толку голем број жртви со тешки изгореници. Северна Македонија учествува во Механизмот за цивилна заштита на ЕУ (UCPM) и може да побара помош во случаи на големи катастрофи. Ова е токму таква ситуација“,
пишува на својот фејсбук-профил Војкулеску.
Тој им посочува на македонските власти итно да поднесат официјално барање за помош за жртвите да добијат специјализиран третман во најдобрите европски центри за изгореници.
„Сигурен сум дека комесарката Хаџа Лахбиб веќе е вклучена и дека европските институции како што се Центарот за координација на итни одговори (ERCC), Генералниот директорат за цивилна заштита и хуманитарна помош (DG ECHO) и Европската комисија за подготвеност и одговор на здравствени итни случаи (HERA) веќе ги преземаат првите чекори за да помогнат. Но, без официјално барање од Северна Македонија, се губи драгоцено време – време што може да спаси животи“,
додава тој.
Војкулеску во објавата вели дека Романија направила трагични грешки во 2015 година по пожарот во ноќниот клуб „Колектив“ доцнејќи со меѓународната помош и не евакуирајќи ги пациентите навреме.
„Многу луѓе изгубија животи непотребно поради политичка неодлучност и бирократски пречки. Северна Македонија не смее да ги повтори овие грешки. Ако сте во Северна Македонија, барајте итна акција од вашата влада! Секој час е важен“,
додава тој.
Според последните информации што ги соопшти министерот за внатрешни работи Панче Тошковски, досега во пожарот во дискотека во Кочани загинати се 59 лица, а бројот на повредени е повеќе од 150.