„Гласањето во Обединетите нации и резолуциите во ОН предизвикаа реакции на амбасадорите на земјите-членки на Европската Унија овде. Акциите се погласни од зборовите. Не треба многу внимателно да се следат состојбите за да се сфати дека геополитиката денес е многу сложена“, рече полскиот амбасадор
Министерот за надворешни работи и надворешна трговија Тимчо Муцунски го истакна значењето на ова меѓупарламентарно тело како континуиран, посветен и силен поддржувач на евроинтегративните процеси на државата, кое дополнително придонесува кон развојот на соработката меѓу Собранието и Европскиот парламент
Евроамбасадорот Михалис Рокас смета дека е важно земјава да ги задржи основните вредности и принципи на Европската Унија и со тоа да ја потврди геостратешката заложба кон европскиот пат.
Рокас ова го истакна на денешниот состанок на Мешовитиот парламентарен комитет (МПК) ЕУ-Северна Македонија и нагласи дека е важно Северна Македонија тоа активно да го покажува во мултилатералните форуми и во рамки на Обединетите нации.
„Сепак, сакам да нагласам дека важно е Северна Македонија да ги задржи основните вредности и принципи на Европската Унија и активно тоа да го покажува во мултилатералните форуми, вклучително и во рамки на Обединетите нации. Со тоа ќе се потврди геостратешката заложба кон европскиот пат, а е и во согласност со членството во НАТО“, рече Рокас.
На состанокот се обрати и полскиот амбасадор Мариуш Бримора, чија земја претседава со Унијата. Според него, важно е С Македонија да остане посветена на европските вредности и принципи.
„Гласањето во Обединетите нации и резолуциите во ОН предизвикаа реакции на амбасадорите на земјите-членки на Европската Унија овде. Акциите се погласни од зборовите. Не треба многу внимателно да се следат состојбите за да се сфати дека геополитиката денес е многу сложена“, рече Бримора.
Тој рече дека како претставник на полското претседателство со Советот на ЕУ го поздравуваат фактот дека Владата на Северна Македонија го поставува како стратешка цел пристапувањето кон ЕУ.
„Од име на нашето претседателство, уште еднаш ја искажувам нашата подготвеност за состанок за пристапување без било какви други политички одлики што Северна Македонија ги завршува своите обврски за уставни промени. Времето е клучно. Сакаме да одиме напред, исто како и вие. Апсолутно клучно е да се искористат сите можности кои ги имаме денес, а со цел да се забрза процесот на пристапување бидејќи сегашниот моментум нема постојано да трае. Покрај уставните амандмани, треба да се унапредувате колку што е можно повеќе во другите реформи поврзани со ЕУ“, додаде Бримора.
Тој изрази задоволство од севкупниот степен на подготвеност на земјата и додаде дека треба да се поздрави тоа што е направено, а треба да се видат и натамошни чекори за спроведување на други реформи брзо, а особено во областа на основните темели и владеењето на правото.
Ние, како што рече Бримора, имаме доверба во вас и сакаме да ве поддржуваме во вашите напори.
Воведни излагања на првата работна сесија на 23. Состанок на МПК имаа пратеничката Иванка Василевска и европратеникот Карло Реслер.
Реслер ja истакна заложбата на Европскиот парламент кон парламентарната димензија на односите меѓу нашата земја и ЕУ.
„По 20 години кандидатски статус и новите геополитички околности на европско ниво, проширувањето се враќа високо на агендата на ЕУ. Дијалогот е важен на сите нивоа, во насока на заедничка европска иднина“, рече Реслер.
Министерот за надворешни работи и надворешна трговија Тимчо Муцунски го истакна значењето на ова меѓупарламентарно тело како континуиран, посветен и силен поддржувач на евроинтегративните процеси на државата, кое дополнително придонесува кон развојот на соработката меѓу Собранието и Европскиот парламент.
Муцунски нагласи дека оваа година означува две децении од добивањето на статусот кандидат за членство во Европската Унија и изрази очекување дека Унијата ќе делува одлучно во насока на поголема предвидливост и конкретно придвижување на пристапниот процес.
„Дваесет години на реформи, компромиси – често тешки и болни, но секогаш водени од визијата за европска иднина. Македонските граѓани останаа посветени на европските вредности, и покрај предизвиците и разочарувањата на овој долг пат. Денес, повеќе од кога било, потребни се јасност, предвидливост и решителност во нашиот интегративен процес. Европа не смее да ја изгуби довербата на граѓаните кои две децении веруваат во европскиот проект“, рече Муцунски.
Тој ја потврди целосната посветеност на Владата на процесот на европска интеграција, со засилен фокус на имплементацијата на клучните реформи. Муцунски посебно се осврна на напредокот во усогласувањето со заедничката надворешна и безбедносна политика на ЕУ, како потврда за приврзаноста на Северна Македонија кон принципите на мир, стабилност и демократски вредности.
Министерот за европски прашања Орхан Муртезани потенцира дека подолго од две децении, овој Мешовит парламентарен комитет е столб на партнерството, кој го насочува нашиот дијалог и гарантира дека европската интеграција на Северна Македонија останува стратешки приоритет.
„Европа се наоѓа пред крстопат. Во свет на растечка неизвесност, Европската Унија има одговорност да дејствува не преку неодлучност, туку преку стратешка визија. Процесот на проширување не може да остане второстепено прашање кога всушност претставува клучна геополитичка неопходност“, рече Муртезани.
Северна Македонија, како што рече, е подготвена да придонесе за Европската Унија, не само како членка, туку и како активен учесник во зајакнувањето на самата Унија.
Вчера, постапките на Северна Македонија во Обединетите нации ги коментираше и францускиот амбасадор Кристоф ле Риголе, според кого гласањето било неочекувано и нагласи дека целта на европската дипломатија е да се одржи унитарноста и да се има исти заеднички пристап кој ќе обезбеди безбедност на континентот во наредните години.
Македонија гласаше воздржано за резолуција подготвена од Киев, а чии спозори беа земјите членки на Европската Унија (ЕУ) и со која повикува на суверенитетот и територијалниот интегритет на Украина и се осудува руската агресија на земјата.