Во коментар пренесен од севернокорејската новинска агенција КЦНА, Јонг Јонг Хак, кој е наведен како аналитичар за меѓународни односи, рече дека целта на посетата на Блинкен била „да се моли за смирување на тензиите“
Северна Кореја во средата ја критикуваше неодамнешната посета на американскиот државен секретар Ентони Блинкен на Пекинг како „патување на просјак“ за намалување на тензиите, велејќи дека тоа е показател за неуспехот на политиката на притисок врз Кина. Блинкен во понеделникот се сретна со кинескиот претседател Си Ѓинпинг, а целта на неговата исклучително важна посета на Пекинг беше да ги намали тензиите и да обезбеди бројните спорови меѓу суперсилите да не прераснат во конфликт, потсетува Ројтерс.
Блинкен, првиот американски државен секретар што се сретна со кинески лидер од 2018 година, по состанокот рече дека ја повикал Кина да ја повика Северна Кореја да го прекине лансирањето на проектили бидејќи Пекинг е во „уникатна позиција“ да изврши притисок врз Пјонгјанг да се вклучи во дијалог.
Во коментар пренесен од севернокорејската новинска агенција КЦНА, Јонг Јонг Хак, кој е наведен како аналитичар за меѓународни односи, рече дека целта на посетата на Блинкен била „да се моли за смирување на тензиите“, бидејќи „обидот да се изврши притисок и да се задржи Кина може да стане бумеранг што би бил смртоносен удар за американската економија“.
„Неодамнешното патување на американскиот државен секретар не може да се оцени поинаку освен како срамно просјачко патување на провокатор кој го признава неуспехот на политиката на притисок врз Кина“,
се вели во коментарот.
Оценето е дека САД се одговорни за ескалацијата на регионалните тензии со „антикинески комплекси“, преку групата КВАД, во која се и Јапонија, Индија и Австралија, како и пактот АУКУС, кој заедно со САД , се состои од Австралија и Велика Британија.
„Врвот на двојната игра и дрскоста карактеристични за САД е прво да провоцираат, а потоа да зборуваат за таканаречената одговорна контрола над разликите во мислењата“,
смета севернокорејскиот аналитичар.