Во соопштение до медиумите тие појаснуваат дека поканата од Владата пристигнала доцна и потсетуваат дека уште претходно побарале средбата да се одржи во Кочани бидејќи дел од родителите не се во можност да патуваат поради последиците од трагедијата. Покрај одбивањето на средбата, семејствата најавија и организирање мирен собир под наслов „Марш на ангелите“, кој ќе се одржи на 10 мај (сабота) во Кочани, со почеток во 16:05 часот
Семејствата на младите што трагично ги загубија животите во пожарот во т.н. кабаре „Пулс“ во Кочани ја одбија поканата за средба со премиерот Христијан Мицкоски, која беше закажана за 13 мај во Скопје. Во соопштение до медиумите тие појаснуваат дека поканата од Владата пристигнала доцна и потсетуваат дека уште претходно побарале средбата да се одржи во Кочани бидејќи дел од родителите не се во можност да патуваат поради последиците од трагедијата.
„Сметавме дека предлогот за средба во Кочани е разумен и оправдан, особено затоа што дел од родителите не се во можност да патуваат поради последиците од трагедијата“,
се наведува во писмото на семејствата.
Тие истакнуваат дека нивниот став не е целосен консензус, туку одраз на мислењето на мнозинството меѓу нив.
Покрај одбивањето на средбата, семејствата најавија и организирање мирен собир под наслов „Марш на ангелите“, кој ќе се одржи на 10 мај (сабота) во Кочани, со почеток во 16:05 часот. Со овој марш тие сакаат да ја одбележат болката, да побараат правда и да ги потсетат институциите дека ваква трагедија не смее да се повтори.
Пожарот што на 16 март го зафати т.н кабаре „Пулс“ ја потресе јавноста и отвори сериозни прашања за безбедносните стандарди, инспекциските контроли и институционалната одговорност. Истрагата сѐ уште трае, а јавноста внимателно го следи секој чекор на надлежните органи.