На прашањето дали е можно коалицирање во рамки на „Европскиот фронт“ по расколот на Алијанса за Албанците минатата година, лидерот на АА, Зијадин Села, вели дека партијата ќе излезе со став кога тоа прашање ќе се разговара во коалицијата
Зијадин Села од Алијанса за Албанците (АА), партија која е дел од коалицијата „Европски фронт“, не гледа ништо лошо во средбите кои, како што рече, изминатиов период ги оствариле првиот интегративец Али Ахмети и Арбен Таравари кој партиципира во владејачката коалиција ВЛЕН како претставник на АА.
На прашањето дали е можно коалицирање во рамки на „Европскиот фронт“ по расколот на Алијанса за Албанците минатата година, Села вели дека партијата ќе излезе со став кога тоа прашање ќе се разговара во коалицијата.
„Лошо е кога се гради политичка кариера врз база на оценување на друг политичар. Тогаш нормално е дека ќе бегаш како од ѓавол за некој да не те фотографира и да се дознае дека си се сретнал со некого. Но, со тоа треба да се соочиш, затоа велам – да, имало средби, но мене лично и на Алијанса за Албанците не ни пречи, а дали треба да биде дел од Фронтот ќе кажеме кога ќе биде тоа прашање отворено внатре во коалицијата“,
рече Села одговарајќи на новинарски прашања по обраќањето за упадот во Собранието на 27 април.
За можно обединување на Алијанса за Албанците, по изјавите на Таравари дека „вратата е отворена“, Села вели:
„Не знам во кој дом и која врата ќе нè вдоми таму, бидејќи тој дом и таа врата се мои. Тој нема ни дом, ни врата.“
Во оваа смисла рече дека однесувањето на политичарите кои секојдневно ги менуваат своите ставови и лажат, притоа алудирајќи на Арбен Таравари, остава голема последица не по партијата, туку по граѓаните. Села го повика членството да се врати, бидејќи, според него, партијата треба да продолжи да гради, а не да разделува.
Села повика и на обединување на целиот албански политички фактор во државата.
„Во ситуација кога политички актери сакаат да ни го укинат правото на јазик, политички актери кои ни го укинаа правото на правична застапеност, мислам дека целиот албански политички фактор треба да се обедини, и Таравари, и Меџити, и Гаши и Касами и така натаму. Го кажав тоа и во првите 100 дена од оваа Влада – за да го спречиме ова што ни се случува треба да се обедини целиот политички албански фактор“,
порача лидерот на АА.