Алијансата за Албанците смета дека на избори треба да се оди на 26 јули. Претседателот на партијата, Зијадин Села, по лидерската средба изјави дека до тогаш ДИК ќе има доволно време за подготовка на изборниот процес, а со отворање на границите ќе може да се обезбедат меѓународни набљудувачи.
„Констатацијата на ДИК, нивното мислење е дека ДИК не може да ги направи изборите во рок од 22 дена по завршувањето на вонредната состојба. Одговорот од ОБСЕ/ОДИХР беше дека тие можат да учествуваат како набљудувачи на овие избори, но треба да се одреди датумот и да се земат предвид здравствените протоколи, како и протоколите за границите. Со други зборови, додека границите се затворени, тие немаат некој одговор. Нашиот предлог за избори на 26 јули, кој е заеднички на Алијансата за Албанците и коалицискиот партнер, е тоа што во овој период прогласувањето на победата над коронавирус ќе продолжи и ќе биде помалку ризично за граѓаните, а исто така во овој период границите ќе бидат отворени за мисијата на набљудувачи на изборите, што е многу битно за изборите. Исто така, ДИК ќе може да ги отвори списоците за граѓаните кои наполниле 18 години“,
порача Села.
Сепак, на оваа средба не се дошло до компромис бидејќи, како што рече Села, „двете македонски партии имаат забарикадирани ставови за датум за избори“. Села ги повика сите партии да најдат заеднички јазик бидејќи, како што рече, за одредувањето датум за избори треба да има политички консензус.