Според владејачката партија, Албанците не се ДУИ ниту, пак, ДУИ има право да зборува во нивно име. Албанците во Македонија, како што велат оттаму, се чесни граѓани што сакаат ред, правда и развој, а тоа е спротивно на она што го нудат Али, Артан, Бујар, Филипче и Заев
Секоја критика за криминалот на Демократската унија за интеграција (ДУИ), Бујар Османи ја претставува како поттик на поделби, велат денеска од владејачката ВМРО-ДПМНЕ. Оваа реакција на партијата следува откако потпретседателот на ДУИ и кандидат за градоначалник на општина Чаир, Бујар Османи, рече дека власта во полн интензитет продолжува да ја спроведува политиката која треба да ги отстрани Албанците од општествените текови, како и дека целта на премиерот Христијан Мицкоски е да ги исклучи Албанците дури и од изборните правила, за што кажа дека не знае дали е само изборна математика или станува збор за некоја потсвесна омраза што постои кај него кон Албанците.
Според ВМРО-ДПМНЕ, вистината е сосема поинаква, односно дека поделбите и неправдите во државата настанаа токму поради Социјалдемократскиот сојуз (СДСМ) и ДУИ и нивната власт заради криминалните тендери, корупцијата и злоупотребата на институциите.
„Бујар, Артан, Заев, Али и Филипче се коалиција на злото што ја жртвува Македонија за да ја ограбат државата и народот. Кога ќе бидат фатени со рацете во медот, Османи и неговите колеги се кријат за етничките теми. Но, Албанците не се ДУИ, ниту пак ДУИ има право да зборува во нивно име. Албанците во Македонија се чесни граѓани што сакаат ред, правда и развој, а тоа е спротивно на она што го нудат Али, Артан, Бујар, Филипче и Заев“,
се вели во соопштението од ВМРО-ДПМНЕ.
Од партијата посочуваат и дека колку и да се обидуваат да ја претворат борбата против криминалот во етничко прашање, знаат дека нема да успее, оти народот кажа дека криминалот не се исплати и дека ДУИ и СДСМ се минато.
Според Османи, Владата на ВМРО-ДПМНЕ и ЗНАМ, предводена од премиерот Христијан Мицкоски, во полн интензитет продолжува да ја спроведува политиката која треба да ги отстрани Албанците од општествените текови, враќајќи ги на нивните периферни позиции од пред Рамковниот договор.
Во објава на Фејсбук, Османи посочи дека станува збор за системска политика на маргинализација и потиснување на Албанците од сите општествени текови обвинувајќи го премиерот Мицкоски за нетолеранција која се манифестира на лично и институционално ниво.