Сејдини, во писмено обраќање објавено на веб – страницата на Фудбалската федерација на Македонија, вели дека ФФМ го одбрало тоа што било сугерирано како најдобро решение за навивачката песна, негирајќи дека тој лично сугерирал промена на стихот во кој се спомнува селекторот Игор Ангеловски – Мрме. Тоа е спротивно на изјавите на Ангеловски, но и на фудбалерите Горан Пандев и Илија Несторовски, кои за „360 степени“ рекоа дека на снимањето на спотот сведочеле на ситуација во која на селекторот му било соопштено дека врвот на ФФМ барал да отпадне стихот во кој се спомнува неговото име
„Никогаш не би дозволил да се мешам во туѓа работа, а посебно да негирам нечии заслуги. Тоа е една од најлошите особини што човек може да ги има“, вели во писмено обраќање претседателот на Фудбалската федерација, Муамед Сејдини, по сторијата на „360 степени“ дека барал да се тргне селекторот Игор Ангеловсли-Мрме од навивачката песна за репрезентацијата за Европското првенство.
Во обраќањето, Сејдини ги нарекува целосно невистинити наводите дека барал да се тргне стихот „Мрме на чело на црвена армија, те слави Македонија“.
„Секогаш практикувам и се обидувам да ги слушам советите на професионалците во својата област, така беше и во случајот со навивачката химна. Го одбравме тоа што беше сугерирано како најдобро решение,.. Апсолутно не очекувам никој мене лично да ме пофали за истото, бидејќи јас ниту асистирам, ниту постигнувам голови, ниту правам тактика за натпреварите. Тоа го прават нашите златни момци и стручниот штаб. Моја најголема одговорност е оваа атмосфера во репрезентацијата, оваа фудбалска бајка да продолжи, да се надградува и никој од страна да не успее да ја расипе. Во спортот нормално е да има разговори и различни мислења. Тие се решаваат интерно и со договор, бидејќи целта на сите нас е Македонија да оди само напред и никако поинаку. Ве уверувам, нема да дозволам никој по било која цена која што е надвор од фудбалот да ја наруши прекрасната атмосфера што владее во репрезентацијата.Тоа е моја должност и обврска. Да го зачуваме тоа што сите нас не прави среќни, горди и радосни“,
вели Сејдини, наведувајќи дека во секое време е на располагање за новинарски прашања, иако „360 степени“ во неколку наврати пред објавувањето на сторијата не успеа да добие негов став.
Сепак, неговата верзија се разликува од она што го споделија со јавноста фудбалерите Горан Пандев и Илија Несторовски, како и селекторот Мрме. Тие рекоа дека на снимањето на спотот сведочеле на ситуација во која на селекторот му било соопштено дека врвот на ФФМ барал да отпадне стихот во кој се спомнува неговото име.
„Како можат да се дрзнат да го тргнат селекторот или некои играчи од химната, тоа е некоректно и жално. Мислам дека стигнала оваа порака до Федерацијата и мислам дека треба добро да размислат пред тоа да го направат. Но, тоа е за секоја осуда. Ја покажаа нивната некомпетентност, нечовечност. Нема да биде коректно да го тргнат селекторот. Ајде, да ги ставиме тогаш луѓето од Управен одбор во химната, дека тие се најзаслужни што се пласиравме на ЕП. Треба да разберат дека ова е репрезентација на сите, а не нивна“,
рече Горан Пандев за „360 степени“.
Присутен на снимањето на делови од спотот за химната бил и репрезентативецот Илија Несторовски.
„Ние играчите бевме повикани да снимаме спот за таа песна. Кога пристигнавме на стадион, не пречекаа Пеце Суперхикс и неговата група – се беше спремно за снимање. Во еден момент почнаа да му објаснуваат на селекторот дека од Федерацијата е побарано да биде тргнат делот во кој се спомнува Мрме. Навистина останавме вчудовидени, не очекувавме таква ситуација, бидејќи знаеме дека тие резултати се постигнати на чело со сегашниот селектор. Снимавме еден дел со него и без него, не знаеме уште како ќе биде. Се надевам дека ќе заврши оваа игра и човекот ќе добие внимание поради сите резултати што ги направи за Македонија“,
изјави Несторовски за „360 степени“.
Во текот на вчерашниот ден, ФФМ на фејсбук страницата, објави дел од фудбалската песна „Одиме на Европско првенство“, во кој се слуша стихот со селекторот Мрме, што би можело да значи дека Сејдини се предомислил.