Како што соопштија од МВР, против приведените ќе бидат преземени мерки согласно законските прописи
Седум лица се приведени денеска по завршување на фудбалскиот натпревар во рамки на Првата македонска фудбалска лига меѓу екипите на ФК Вардар и ФК Шкупи, одигран на спортскиот комплекс на Фудбалската федерација на Македонија (ФФМ) „Петар Милошевски“ во Скопје, информира Министерството за внатрешни работи (МВР).
Како што наведуваат од полицијата причина за приведувањата се сторени прекршоци со фрлање пиротехнички средства и дрско однесување кон полицијата.
„На две одделни локации на подрачјето на Град Скопје се приведени вкупно седум лица поради сторени прекршоци со фрлање на пиротехнички средства од Законот за спречување на насилство на спортски натпревари, како и за нарушување на јавен ред и мир со непристојно и дрско однесување и непочитување наредба на полициски службеници“,
се вели во полициското соопштение.
Против нив ќе бидат преземени мерки согласно законските прописи.
Инаку, ФК Вардар го победи ФК Шкупи во дуелот од Првата македонска фудбалска лига.