Нема потреба од затворање на градинките поради пандемијата на ковид-19, е ставот на министерката за труд и социјална политика Јагода Шахпаска, која вели дека се забележува и тренд на враќање на децата. Од отворањето, бројот на деца што одат во градинка се зголемил за околу 650.
„Не се планирани затворања на градинките. Во последниот неделен извештај што го реферирав на кризен штаб, како и секој понеделник, имаме тенденција на пад како на бројот на новозаразени вработени така и на деца. Ова е тренд кој тече трета седмица, значи имаме помалку отколку од претходната недела. Поголем е бројот е на деца што се враќаат во градинките. За една седмица околу 500 деца се вратени од изолација во градинките. Бројот на деца во градинките е повеќе од 10 илјади, односно изнесува 10 150, а беше 9 500“,
истакна Шахпаска.
Министерката тврди и дека работното време на градинките е според Закон, односно од Министерството не е испратен никаков допис за негово зголемување.