Приложувањето и поседувањето потврда за извршена имунизација со најмалку прва доза вакцина, се однесува на лица над 18 годишна возраст
Од 16 август целосно се забранува работа и организација на секаков вид настани на затворено во сите угостителски објекти и во кафетериите, а за влез на било каков настан во секаков вид на објект се воведува задолжителна потврда за извршена имунизација, најмалку со прва доза.
Потврдите ќе ги проверува редарска служба и оваа мерка ќе важи за присуство во секаков вид на објект вклучувајќи ги и угостителски објекти, каде има повеќе од 30 присутни лица, а ќе важи и за присуство на прослава, концерт, семинар, обука, работилница, конференција, културни или спортски настани. Приложувањето и поседувањето потврда за извршена имунизација со најмалку прва доза вакцина, се однесува на лица над 18 годишна возраст.
„До 15 август, сите угостителски објекти регистрирани за прослави смеат да работат на затворено, само со почитување на ковид-19 мерките, со исполнетост до 40% од капацитетот и најмногу 250 гости, согласно постојните протоколи кои се во сила. За ноќните клубови (дискотеки), кабареа, барови останува забраната за работа во затворениот дел од објектот, освен во отворениот дел (тераси) со 50% од капацитетот на просторот и ограничен број на посетители до најмногу 1 000 посетители, согласно постојните протоколи“,
информираше вечерва премиерот Зоран Заев на својот профил на Фејсбук.
Владата ги задолжи надлежните инспекциски служби во претстојниот период да ги интензивираат контролите со цел стриктна примена и почитување на превентивните препораки, времените мерки и наредените мерки по однос на ковид-19.