Градоначалникот вели дека полицијата веднаш пристигнала на местото на настанот и дека се известени надлежното обвинителство и градежниот инспектор, кои ќе спроведат истрага и ќе ја утврдат причината поради која дошло до оваа несреќа
Во градинка во населеното место Козарска Дубица во Босна и Херцеговина денеска се урнал дел од таванот во една од просториите каде што престојуваат децата, пренесуваат босанските медиуми.
Инцидентот, како што пишува „Н1“, поминал без поголеми последици за децата. Три деца со помали гребаници се примени на Итната помош во придружба на воспитувачка и директорката на градинката.
„Во една од собите каде што се сместени децата падна дел од таванот. Децата веднаш ги однесовме на безбедно и ги повикавме надлежните служби, Итната помош, полицијата, пожарникарите и надлежните органи во Општинската управа“,
изјави директорката на оваа предучилишна установа.
Таа вели дека најважно е што во овој инцидент нема потешко повредени деца.
Дека за среќа нема повредени деца, истакна и градоначалникот на Општина Козарска Дубица, Игор Савковиќ, кој веднаш по настанот ја посетил оваа предучилишна установа.
„Веднаш откако дознав за тоа што се случило во градинката, дојдов на местото на настанот. Станува збор за парче мебел што паднало од дел од таванот, можеби на простор од околу два метри. За среќа на сите најважно е што ниту едно од нашите малечки не е повредено, сите родители беа информирани и дојдоа да ги земат своите деца во Здравствениот дом, каде штотуку беа однесени трите деца“,
вели тој.
Савковиќ вели дека полицијата веднаш пристигнала на местото на настанот и дека е известено надлежното обвинителство и градежниот инспектор, кои ќе спроведат истрага и ќе ја утврдат причината поради која дошло до оваа несреќа.
„Општината секако ќе ги сноси трошоците за реновирањето, а експертите ќе кажат што треба да се направи“,
вели Савковиќ.
Кога станува збор за продолжување на работата на градинката, Савковиќ истакна дека за ова ќе одлучи инспекторот, но и оти верува дека градинката ќе биде затворена до понатамошно известување.