Досегашните потпретседатели на партијата – Александар Николоски, Владо Мисајловски, Гордана Димитриеска-Кочоска и Тимчо Муцунски, според најавата на партискиот лидер, ќе бидат предложени за членови на Извршниот комитет
ВМРО-ДПМНЕ во овој мандат нема повеќе да има потпретседатели. Ова во синоќешното интервју за МРТ 1 го изјави премиерот и лидер на владејачката партија во пресрет на денешниот Централен комитет (ЦК) на ВМРО-ДПМНЕ на кој треба да бидат избрани новите членови на Извршниот комитет (ИК) и нов генерален секретар.
Досегашните потпретседатели на партијата – Александар Николоски, Владо Мисајловски, Гордана Димитриеска-Кочоска и Тимчо Муцунски, според најавата на Мицкоски, ќе бидат предложени за членови на Извршниот комитет.
„Партијата во овој мандат нема да има повеќе потпретседатели. Ќе има претседател, генерален секретар и членови на Извршниот комитет. Нормално, досегашните потпретседатели ќе бидат предложени како членови на Извршниот комитет на партијата и плус ќе има некои други имиња“,
изјави Мицкоски во синоќешното интервју за МРТ 1.
На денешниот Централен комитет, како што рече, ќе присуствуваат сите што по Статут ќе бидат дел од Извршниот комитет – координаторот на пратеничката група, претседателката на Унијата на жени, претседателот на Унијата на млади, претседателот на Унијата на ветерани, претседателот на партијата, генералниот секретар.
„Значи, новиот состав на Извршниот комитет би требало да брои некаде околу 29 луѓе. Очекувам приближно 20 до 25 проценти нови луѓе кои ќе бидат дел од новиот Извршен комитет на партијата“,
додаде Мицкоски.
На следниот партиски конгрес на ВМРО-ДПМНЕ во 2029 година, како што и претходно најави, ВМРО-ДПМНЕ ќе има ново раководство и нов претседател.