Младата Јелена Арменска за МИА раскажува дека првите десет минути била свесна, а потоа се онесвестила. По кобниот настан, првично била однесена во комплексот клиники „Мајка Тереза“ во Скопје, а оттаму нејзиното лекување продолжува во болницата „Ла Паз“ во Шпанија, каде што останала една недела
Јован Костадинов, матурантот од Виница, кој трагичната ноќ на 16 март спаси 21 повреден во пожарот во т.н. кабаре „Пулс“ во Кочани, сподели ново сведоштво за кобниот настан. Говорејќи овој пат за државната новинска агенција МИА, младото момче скромно вели дека таа ноќ херои биле сите што помогнале во спасувањето на повредените.
На почетокот, откако настанала паниката во објектот, вели бил збунет и не знаел што се случува.
Мислел дека станува збор за тепачка.
„Но, потоа кога почна да излегува густ црн чад сфатив дека е пожар. Нe бев сам, имаше и други херои кои помагаа таму“,
раскажува Јован.
Вели дека таа вечер нема да ја заборави до крајот на животот и дека во тој момент не мислел на сопствениот живот, туку на тоа да спаси што повеќе луѓе.
„Беше полошо од хорор филм. Во тој момент не мислиш на ништо друго, не размислуваш на тоа дека можеш да го изгубиш сопствениот живот, само гледаш да помогнеш, тогаш не ја гледаш опасноста. Во тие моменти има голем адреналин кај сите и не размислуваш за сопствениот живот“,
вели младиот Јован, кој е матурант во училиштето „Ванчо Прке“ во Виница.
Меѓу повредените, која успеала да се спаси со негова помош, била Јелена Арменска од Берово. Таа неодамна се врати од лекувањето во Шпанија и за МИА го раскажува за кобната ноќ, за херојството на нејзиниот другар Јован кој ја спасил, како и за помошта од полицајците и обезбедувањето на клубот.
„Се спасив благодарение на Јован. За среќа, имало Господ, јас и моите две другарки се вративме живи и здрави. Хероите беа таму, пожарникарите и обезбедувањето цело време се трудеа“,
вели Арменска.
По настанот, таа била првично однесена во комплексот клиники „Мајка Тереза“ во Скопје, а оттаму нејзиното лекување продолжува во болницата „Ла Паз“ во Шпанија, каде што останала една недела.
„Првите 10 минути бев свесна, потоа се онесвестив. Бев однесена на Токсикологија, па потоа на КАРИЛ, а оттаму заминав во болницата ‘Ла Паз’ во Шпанија. Таму беше страшно, имаше повредени на кои има беше направена пластична операција“,
раскажува Арменска.
Во пожарот што на 16 март се случи во т.н. кабаре „Пулс“ во Кочани животите ги загубија 60 лица, а повредени се речиси 200 луѓе.
Завчера од Министерството за здравство соопштија дека 29-годишниот Александар Карадаковски, управител на т.н. кабаре „Пулс“, кој беше на лекување во Литванија, е 60-тата жртва на катастрофалниот пожар.