Од турското Министерство за одбрана велат дека поради неодамнешните настани во регионот, се преземаат неопходни мерки за заштита на границите и воздушниот простор, и оти се во консултација со НАТО и со сојузниците
Турското Министерство за одбрана објави дека американскиот систем за воздушна одбрана „патриот“ е распореден во југоисточната покраина како дел од „засилените мерки за воздушна и ракетна одбрана“ на НАТО.
„Поради неодамнешните настани во нашиот регион, се преземаат неопходни мерки за заштита на нашите граници и воздушен простор, и ние сме во консултација со НАТО и сојузниците“,
се вели во објавата од министерството на социјалната мрежа Икс.
Malatya’da Konuşlandırılan Patriot Sistemi ile İlgili Açıklama
— T.C. Millî Savunma Bakanlığı (@tcsavunma) March 10, 2026
Statement on the Patriot System Deployed in Malatya#MillîSavunmaBakanlığı pic.twitter.com/54gB7SrTDp
Тие додаваат дека, покрај националните мерки, НАТО ја зајакнал воздушната и ракетната одбрана и дека во оваа рамка, системот „патриот“ моментално е во Малатја и се подготвува за оперативна подготвеност за поддршка на заштитата на турскиот воздушен простор.
„Нашата земја, која го одржува својот одбранбен и безбедносен капацитет на највисоко ниво, ќе продолжи да ги проценува случувањата во соработката и консултациите со НАТО и нашите сојузници и да се стреми кон регионален мир и стабилност“,
додаваат од министерството.
Турскиот претседател Реџеп Таип Ердоган претходно го предупреди Иран да не презема понатамошни „провокативни чекори“ откако балистичка ракета влезе во турскиот воздушен простор.
Неговите коментари, објавени од државната агенција Анадолу, дојдоа откако турското Министерство за одбрана соопшти дека балистичка ракета лансирана од Иран влегла во турскиот воздушен простор пред да биде пресретната од воздушните и ракетните одбранбени системи на НАТО во Источниот Медитеран.
Иран негираше дека ја лансирал ракетата кон Турција. Портпаролот на иранското Министерство за надворешни работи, Есмаил Багаеи, посочи дека станува збор за „операција со лажно знаме“, но не обвини ниту една конкретна земја.
Ова е вторпат силите на НАТО да пресретнат ракета лансирана кон Турција од почетокот на ескалацијата на конфликтот на Блискиот Исток. Првиот пат се случи пред шест дена, кога воздушните сили на Алијансата ја собориле ракетата пред да влезе во турскиот воздушен простор.