Министерката Шахпаска рече дека остануваат протоколите според кои вработените треба да носат заштитни маски, да не влегуваат во други групи, честа дезинфекција, работа на отворено со децата и често проветрување на просториите…
Градинките се подготвени за поголемо присуство на децата од 1 септември, меѓутоа и понатаму почитувањето на мерките претставува врвен приоритет. Согласно последниот пресек, 71 процент од вработените во градинките се веќе вакцинирани, информира министерката за труд и социјална политика, Јагода Шахпаска, при денешната посета на клонот „Сончогледи“ во склоп на градинката „Весели цветови“ во општина Кисела Вода.
Таа посочи дека по една година искуство можат да говорат за тоа дека кога се почитуваат доследно протоколите згрижувањето на децата во градинките е безбедно.
„Нашиот апел, кој произлезе и од заедничката средба со директорките на скопските градинки, меѓутоа и градинките од целата држава е сите вработени да пристапат кон процесот на вакцинација, затоа што преку грижа за личниот имунитет тие придонесуваат и за колективниот имунитет, пред се за грижата за нашите најмлади, односно за децата згрижени во градинка“,
нагласи Шахпаска.
Министерката за труд и социјална политика наведе дека е спроведен и онлајн состанок со другите вработени кои се уште не се вакцинирани и три доктори, заедно со претседателот на Комисијата за заразни болести, со цел разбивање на дилемите што ги имаат невакцинираните вработени во градинките.
„И понатаму, заедно со сите вработени од МТСП, будно ќе ја следиме состојбата со вработените во градинките, со бројот на позитивни, како вработени, така и деца. Имајќи предвид дека претходно немаше трансмисија меѓу дечињата во градинкит,е се надевам дека и овој бран, предизвикан со делта сојот, ќе успееме безбедно да го премостиме и да се вратиме на нашето нормално секојдневие“,
рече Шахпаска.
Министерката рече дека остануваат протоколите според кои вработените прво треба да измерат температура и во текот на целиот ден да носат заштитни маски. Согласно протоколите, додаде таа, да не влегуваат во други групи освен во групата за која што се конкретно задолжени, честа дезинфекција, работа на отворено со децата и често проветрување на просториите.
Таа наведе дека во петокот бројката на позитивни вработени во градиниките била 17 и шест позитивни дечиња. Сепак, како што рече, состојбата е стабилна и е под контрола Информираше дека од петокот бројката на присутни деца во градинките е 4 408, а бројот на слободни места, согласно со вчера важечките протоколи, е 25 500.
Шехпаска посочи и дека повторно се прошируваат групите во градинките.
„По препорака на Комисијата за заразни болести, вчера на владина седница беше донесена одлуката за проширување на бројот за дополнителни пет деца. Ние веќе имавме една измена на протоколот на 19 мај, кога беше зголемен бројот од 15 на 20 деца во групите од две до шест години, а сега се зголемува тој број за дополнителни пет деца. Јас верувам дека грижата за децата ќе биде на ист начин како и за тие 20 деца, дека ќе биде безбедна и дека доследно ќе се почитуваат протоколите“,
заклучи Шахпаска.