За осомничениот, јавниот обвинител до судија на претходна постапка од Основниот суд во Куманово ќе достави предлог за определување мерка притвор
Триесет и петгодишник од Скопје се претставувал како вработен во Агенцијата за управување со одземен имот и со две лица во Куманово склучил фиктивни договори за наводна продажба на станови во Скопје и Охрид, информираат од Јавното обвинителство на РСМ, од каде што денеска соопштија дека е против него и неговата фирма е донесена наредба за спроведување истражна постапка, за сомнение за сторено кривично дело – измама.
„Пријавениот сопственик на правното лице, со цел да прибави противпаравна имотна корист за себе и за својата фирма, лажно прикажувал факти дека врши посредување при продажба на станови и возила во сопственост на Агенцијата за управување со одземен имот – Скопје. Измамените граѓани му плаќале пари, еден дел во готово, а друг дел на сметка на правното лице, со што осомничениот прибавил противправна имотна корист од 115 754 евра“,
велат од Обвинителството.
Оттаму велат дека за осомничениот, јавниот обвинител до судија на претходна постапка од Основниот суд во Куманово ќе достави предлог за определување мерка притвор.