Снимката е објавена денеска, а датумот што е наведен во нејзиниот наслов 25.4.2021 коинцидира со протестот што беше организиран во неделата под мотото „Слобода за уставобранителите“
Ќосето и Ченто се меѓу 16-те правосилно осудени за терористичко загрозување на уставниот поредок и безбедноста
На јутјуб-канал со име „Кулата мала“ е објавена аудиоснимка која е насловена како „Јане Ченто и Горан Ќосето спремаат ликвидација на Заев и семејство 25 04 2021“ и со него се посочува на двајцата осуденици за упадот во Собранието на 27 април 2017 година.
Разговорот од снимката не може да се разбере во целост, но од она што може да се слушне е дека се упатуваат зборови оти ќе настрадаат Заев и други лица.
„Тие лајк што им ставеле ќе страдаат, а не па оние што раководат“;
„Ај ќе видиш, јас зборот си го држам“;
„Јас ти кажувам дека Заев ќе биде изрешетан ко куче среде Струмица, со глава ти гарантирам, три деца имам, да не си видам никојпат, памти ми го зборот“;
„Ќе му вратам, па последно да ми е, прстот само да ми мрда доста е“;
„Јас сум спремен да лежам, доживотно можам да лешам, убаво ми е во затвор, супер си се чувствувам“;
„…Пукам и оставам пуштака таму за успомен“;
„…Жени, деца, брат, сестра сè живо, масакр, масакр…“
Од снимката може да се забележи дека еден од гласовите ги кажува овие работи, додека вториот глас поретко се вклучува во разговорот и тешко се разбира што кажува.
Аудиоснимката прв ја објави порталот „А1он“, според кој, до редакцијата стигнала порака на е-пошта во која исто така се тврди дека разговорот е помеѓу Горан Ќосето и Јане Ченто.
Снимката е објавена денеска, а датумот што е наведен во нејзиниот наслов 25.4.2021 коинцидира со протестот што беше организиран во неделата под мотото „Слобода за уставобранителите“.
Од Управата за извршување санкции која е надлежна за затворите, пак, не коментираат околу снимката која, според објавувачот, е направена во затворската установа каде се двајцата осуденици. Оттаму велат дека за веродостојноста и автентичноста на аудиото треба прво да се направи истрага и да се произнесат од Секторот за компјутерски криминал и дигитална форензика при МВР затоа што снимката е нејасна.
Ќосето и Ченто се меѓу 16-те правосилно осудени за терористичко загрозување на уставниот поредок и безбедноста. Според одлуката на Апелацискиот суд кој ги потврди осудителните пресуди, Горан Анѓеловски-Ќосето доби 11 години затвор, а Ченто 13.