Според него, екипите на Државниот пазарен инспекторат (ДПИ) и Комисијата за заштита од конкуренција се постојано на терен, а има и покренати одредени постапки
Се подготвуваат нови мерки за високите цени на прехранбените производи во маркетите, најави денеска премиерот Христијан Мицкоски од Зрновци, додавајќи дека тоа е со цел да им се излезе во пресрет на граѓаните.
„Мерките се во тек, а тоа што не правиме естрада од политиките што ги водиме не значи дека не се грижиме“,
кажа тој.
Според него, екипите на Државниот пазарен инспекторат (ДПИ) и Комисијата за заштита од конкуренција се постојано на терен, а има и покренати одредени постапки.
Посочи дека на почеетокот на учебната година се веведе т.н. училишна кошничка со која се намалија цените на голем дел од производите што ги користат учениците.
Премиерот денеска рече и дека треба да се пресметаат посебни потрошувачки кошнички – за самец, за млад брачен пар, за тричлено и четиричлено семејство, како и за пензионери.
Додаде дека останува на ставот за промена на пресметката за потрошувачката кошничка. Според него, трошоците на различни категории граѓани не се исти и не може исто да се третираат.
Сојузот на синдикати на Македонија (ССМ) вчера соопшти дека вредноста на синдикалната минимална кошничка за септември 2025 година изнесува 65 077 денари, што претставува намалување за 430 денари споредено со август годинава, кога беше 65 507 денари.
На едно четиричлено семејство, според пресметките на ССМ, во септември за образование му биле неопходни 7 097 денари или 10,9 отсто, рекреација и култура 5 592 денари или 8,6 отсто, за ресторани и хотели 4 131 денари или 6,3 отсто и за останати стоки и услуги 1 100 денари или 1,7 отсто.
Од минималната синдикална кошничка едно четиричлено семејство за храна и пијалаци треба да одвои 23 394 денари или 35,9 отсто, за облека и обувки 5 725 денари или 8,8 отсто, за станарина, вода, електрична енергија и греење 6 096 денари или 9,4 отсто. За лична хигиена и оддржување на хигиена во домот 2 636 денари или 4,0 отсто, за транспорт 4 716 денари или 7,2 отсто, за комуникации 3 417 денари или 5,3 отсто, за здравје 1 174 денари или 1,8 отсто.