Предложив и е во изработка закон за плати во којшто ќе се дефинира најголемата плата во државата и сите плати потоа ќе бидат врз основа на таа највисока плата унифицирани, односно ставени во една конзистентна рамка, вели премиерот
Премиерот Димитар Ковачевски смета дека мора да има закон со кој ќе се стави ред и конзистентност во примањата, особено на раководните лица.
„Затоа предложив и е во изработка закон за плати во којшто ќе се дефинира најголемата плата во државата и сите плати потоа ќе бидат врз основа на таа највисока плата унифицирани, односно ставени во една конзистентна рамка“,
изјави денеска на прес конференција премиерот Димитар Ковачевски.
Висината на платите, според Ковачевски, се решава со правење на закон за плати во државата во којшто ќе се направи конзистентност, бидејќи ние, како што рече, во моментов имаме неконзистентност на платите и јас бев тој којшто го потегна тоа прашање.
„Министерството за информатичко општество и администрација веќе работи на тоа. Тоа е поголем процес бидејќи се работи навистина за голема управа со голем број на плати, меѓутоа јас нема да отстапам од тој концепт дека мора да има закон со којшто ќе се стави ред и конзистентност во примањата особено на раководните лица. А, што се однесува до другите вработени тоа е предмет на колективно договарање каде што мора да учествуваат и синдикатите заедно со работодавците“,
додаде Ковачевски.
Во однос на месечните примања на членови на управни и надзорни одбори, прашање кое опозициската ВМРО-ДПМНЕ го поставува изминатите денови, Ковачевски рече дека кога се зборува за менаџирање со одредена компанија или организација, треба да се споредат перформансите со примањата.
„Вчера опозицијата објави примања на директори на М-НАВ, кои се повеќекратно поголеми од сите примања во државата. Висината на тие примања јас не знам како е определена, бидејќи не сум се занимавал со тоа прашања. Знам дека таму при определувањето на платата има удел и меѓународните организации во кои што таа компанија членува, бидејќи се грижи за контролата на прелетите и летањето над државата. И самите видовте дека при изборот на кадри кои ќе работат таму ја прават консултантски и експертски куќи надвор од државата“,
додаде премиерот.
Ковачевски рече дека е задоволен од сите нови директори на државни институции и претпријатија кои се именувани откако тој е претседател на Владат, но дека не треба да се сензационализам од тоа, туку навистина треба да се работи на начин да се изберат вистински луѓе за вистинско место.
„Јас откако сум дојден, имаме нов директор на Македонска пошта, имаме нов директор на Фондот за здравство, нов директор на Санитарен и здравствен инспекторат, нов директор на Финансиска полиција и низа други директори. Досега од тие кои јас сум ги поставил , не гледам дека има некои недостатоци, туку напротив, тие добро си ја работат работата и се надевам дека така и ќе продолжат“,
изјави Ковачевски.