Вучиќ најави дека во следните неколку дена таму ќе биде отворено божиќно село за сите граѓани, по што сообраќајот во тој дел од градот ќе биде нормализиран
Пред Домот на Народното собрание во центарот на Белград, доцна синоќа се отстранети шаторите каде што повеќе од осум месеци престојуваа поддржувачите на властите, пишуваат српските медиуми.
Претседателот на Србија, Александар Вучиќ, во обраќање пред приврзаници на властите собрани синоќа пред парламентот, најави дека во следните неколку дена таму ќе биде отворено божиќно село за сите граѓани, по што сообраќајот во тој дел од градот ќе биде нормализиран.
Во Пионирскиот парк, што се наоѓа спроти српскиот парламент, сè уште има неколку шатори и метална ограда, додека „канцеларијата за регистрација“ што се наоѓаше кај кружниот тек е преместена.
Вучиќ, исто така, најави дека во следниот месец ќе бидат отстранети шаторите и од овој парк.
Вучиќ синоќа објави дека следната година ќе се одржат избори, на кои, како што рече, актуелните власти ќе постигнат убедлива победа и со тоа „дефинитивно ќе се потврди довербата на граѓаните“.
„Го прифативме нивното главно барање, ќе одиме на избори следната година. Нема да бидат толку среќни кога ќе ги пребројуваат гласовите. Ќе ги победиме на секое место во Србија“,
рече Вучиќ.
Тој додаде дека „обидите за преземање на власта на улица се завршени“, тврдејќи дека граѓаните собрани околу Пионирскиот парк и платото пред Собранието „ја спасиле државата“.
„Мојот предлог е да се ослободи овој простор за некое време, бидејќи нивните обиди за преземање на власта се завршени“,
додаде тој.