По околу 2,5 години, во скопската Oпштина Шуто Оризари се врати стариот проблем – нема гинеколог што сака да работи таму. Докторката Вјолца Мбиара решила да замине оттаму и да си отвори ординација на друго место. Засега не е најден нов гинеколог за оваа општина, но здравствените власти се оптимисти.
„Претпоставувам дека тоа е одлука на гинекологот. Пред една недела најави дека сака да отвори ординација на друго место. Разговараме интензивно со неколку институции дали може да обезбедиме гинеколог по системот на ротација. Доколку не може, ќе обезбедиме средства за дополнителна стимулација преку програма во Министерството за здравство за таму да има еден гинеколог“,
вели министерот за здравство Венко Филипче.
Тој најави дека ќе разговараат и со специјализантите што се при крај на специјализацијата и е оптимист дека ќе се најде решение и жените во Шутка нема повторно да останат без гинеколог.
„Овој систем на ротација што го дозволивме со измена на законот е нешто што многу олеснува за лекарите да можат да одат во места каде што недостасуваат лекари од такви специјалности. Тоа веќе почна да се спроведува во некои градови во Источна Македонија меѓу здравствените домови и болниците. На пример, како што е во Радовиш, Валандово, струмичката болница, невролози и останати интернисти, специјалисти. Верувам дека ќе се изнајде решение. Мислам дека ова нема да биде прашање кое нема да може да се изменаџира и жените таму ќе добијат матичен гинеколог“,
смета Филипче.
Вјолца Мбиара дојде да работи во Шутка од Албанија во септември 2017 година, кога министер за здравство беше Арбен Таравари. Претходно со години во амбулантата во Шутка немаше гинеколог што ќе обезбеди континуирана гинеколошка здравствена заштита за жените во оваа општина.