Причина за одложувањето беше тоа што адвокатот на еден од обвинетите денеска имал притворски предмет во Основниот суд во Кочани, за што го информираа скопскиот Кривичен суд на 11 март
„Имаме предлог за спојување на овој предмет со предметот за кој веќе се води судска постапка бидејќи станува збор за иста фактичка состојба за која се предлагаат различни докази, затоа предлагаме спојување на предметите“, рече еден од адвокатите на обвинетите денеска
Во Основниот кривичен суд Скопје денеска се одложи формалниот почеток на судскиот процес против 13 полициски службеници во врска со т.н. кабаре Пулс, каде што загинаа 63 лица, а повеќе од 200 беа повредени.
На денешното рочиште беа присутни сите 13 обвинети, но причина за одложувањето беше тоа што адвокатот на еден од нив на 11 март испратил барање да се одложи главната расправа закажана за денеска бидејќи бил бранител во притворски предмет во судот во Кочани кој е приоритетен.
„Судот констатира дека на 11.03.2026 година во Судот е примено барање за одлагање од адвокат Роберт Марков од Кочани, бранител на Кире Богатинов и Кристина Николова, бидејќи на истиот ден (1 април 2026 г.) во 9 часот е бранител во притворски предмет, кој е приоритет, а кој се води во Основниот суд Кочани“,
кажа судијката Фанка Јанчулева-Михаиловска, која претседава со петчлениот судечки совет во овој предмет, а во кој втор судија е Лидија Петровска.
Судијката Јанчулева-Михаиловска соопшти дека телефонски го контактирала адвокатот и побарала од него да обезбеди замена за денешното рочиште за да може да се утврди динамиката на судењето и да се закажат дополнителни термини, со цел, како што рече да се обезбеди ефективност на процесот.
Така, наместо Марков, на рочиштето беше присутен адвокатот Зоран Ристовски, како негова замена.
Еден куп поднесоци и барање за спојување предмети
Дополнително, како што наведе судијката до судот пристигнале голем број поднесоци и барања од одбраната на обвинетите. Речиси сите бранители поднеле поднесоци до судот, но тоа го сториле непосредно пред рочиштето, односно денеска и вчера, поради што ниту судот, ниту обвинителството имало време да ги разгледа и да се произнесе по нив.
Судијката апелираше во иднина поднесоците да се доставуваат навремено бидејќи, како што рече, доцнењето влијае врз траењето на постапката и можноста тие да бидат разгледани од судот и доставени до Јавното обвинителство.
Сите поднесоци беа прочитани денеска и доставени до обвинителката Спасенка Андонова, која го застапува обвинителниот акт. Најголем дел од нив се однесуваа на листи на докази, а за еден реагираше судијката, која побара да се внимава на реториката и да се почитува достоинството на сите страни вклучени во постапката.
Судијката цитираше дел од еден од предлозите кој бил доставен утрово, а во кој, како што наведе, пишувало:
„Она што се обидува Јавното обвинителство да го направи во оваа судница е недозволиво нудејќи две теории на случај за еден ист настан, со исти фатални последици“
Откако судијката констатира дека не се исполнети условите за одржување на денешното рочиште, за збор се јави еден од адвокатите на обвинетите кој предложи, односно побара спојување на овој предмет со, условно кажано, големото судење за пожарот во т.н. кабаре „Пулс“, кое започна на 19 ноември лани, а во кое се обвинети 35 физички лица, меѓу кои сопственикот на „Пулс“, управители на фирми, градоначалници на Кочани, вработени во Министерството за економија и поранешни министри во оваа институција.
„Имаме предлог за спојување на овој предмет со предметот за кој веќе се води судска постапка бидејќи станува збор за иста фактичка состојба за која се предлагаат различни докази, затоа предлагаме спојување на предметите“,
рече адвокатот.
Судијката кажа дека предлогот ќе биде даден на обвинителството кое за него ќе се произнесе на наредното рочиште.
Следното рочиште судијката Јанчулева-Михаиловска го закажа за 6 мај, кое, како што кажа, ќе биде подготвително и на него ќе се утврди динамиката на водењето на главната расправа, во смисла на нејзината ефикасност и целисходност.
Кои се обвинетите и за што се товарат
Инаку, денеска во судницата број шест во скопскиот Кривичен суд на обвинителна клупа седнаа Дејан Псалтировски, Ванчо Ѓорѓиевски, Марија Маневска, Томо Донев, Драган Петрушев, Кире Богатинов, Стојанче Филипов, Благица Митева, Кристина Николова, Мазлуд Рамаданов, Дарко Милошевски, Мартин Арсовски и Марјан Радевски.
Обвинителниот акт, по повеќемесечна истрага Основното јавно обвинителство за гонење организиран криминал и корупција (ОЈО ГОКК) против нив го поднесе на 30 јануари годинава. Од обвинетите 13 полициски службеници, девет се полицајци, а четири се началници – двајца од ОВР Кочани и двајца од СВР Штип.
Тие се товарат дека сториле кривично дело тешки дела против општата сигурност, поврзани со пожарот што на 16 март 2025 година се случи во т.н. кабаре „Пулс“ во Кочани.
Според Обвинителството, тие од 14 до 16 март – денот кога се случи трагедијата, одобриле и спровеле план за акциска контрола без да проверат дали тој ги има опфатено сите проверки што се во нивна надлежност, ниту, пак, дали се почитувани одредбите од стандардните оперативни процедури за проценка и управување со ризик при вршење полициски работи. Кобната ноќ влегле во „Пулс“ во 2:20 часот по полноќ, по усна наредба, а пиротехниката, што се смета за непосредна причина за избувнувањето на пожарот, се активирала среде контролата.
Обвинителството ги товари дека кога ја спроведувале акциската контрола во „Пулс“, не презеле мерки за заштита на присутните лица, ниту мерки за спречување активирање на пиротехничката опрема на сцената, која не била пријавена во ПС Кочани.
„Како последица на несоодветните услови за работа во текот на акциската контрола, настанал пожар, при што придонеле за настапувањето смрт на 63 лица, а 223 се здобиле со тешки телесни повреди и телесни повреди“,
наведоа од ОЈО ГОКК дента кога го поднесоа обвинителниот акт.
Покрај обвинителниот акт ОЈО ГОКК поднесе и два обвинителни предлози. Во првиот се обвинети тројца полицајци и по него веќе се води судска постапка, додека во другиот кој допрва треба да почне, се опфатени девет полициски службеници. И во двата случаи полицајците се товарат за кривичното дело злоупотреба на службената положба и овластување по член 353 од Кривичниот законик (КЗ).
Новата обвинителка вели дека сè тече најнормално
Трите предмети ги водеше обвинителката Ивана Алексова-Трајчева, но откако Советот на јавни обвинители минатата недела на седница не ѝ го продолжи мандатот во ова Обвинителство, нив ги презеде нејзината колешка Спасенка Андонова.
Таа одговарајќи на новинарски прашања по денешното рочиште за тоа дали имала време да се запознае со предметите, рече:
„Секако, значи начинот на проследување на предметите секогаш бара еден одреден краток временски период на подготвување, така што тоа е нешто што тече најнормално, за примопредавање на предметите, следи запознавање и присуство на главна расправа. Впрочем, и вчера се одржуваше главна расправа, која течеше непречено во поглед на доказната постапка и таму веќе динамиката е во многу понапредна фаза и верувам дека дадените термини ќе овозможат и неправосилно завршување на таа постапка“,
рече Андонова.
Обвинителката не сакаше да ги коментира барања за спојување на предметот против 13-те полицајци со главниот предмет за пожарот во „Пулс“, наведувајќи дека по предлогот ќе се изјасни откако ќе го проучи.
„Ќе ми оставите време, како што впрочем и судот немаше време да ги разгледа поднесоците, беа поднесени непосредно пред започнување на оваа главна расправа, истите сега на оваа главна расправа ми беа врачени од страна на судот, јас ќе морам да ги разгледам, да ги анализирам и потоа ќе следи произнесување по однос на истите“,
кажа обвинителката.