Доктор Лидија Симоновска од ЦЈЗ Охрид очекува при денешното повторно земање мостри од изворот да се увиди намалување на матноста на водата бидејќи, како што рече, деновиве нема активности на каменоломот, кој е во непосредна близина на изворот Шум
Центарот за јавно здравје (ЦЈЗ) Охрид информира дека се намалува матноста во изворот во селото Шум од каде што Струга и околните села се снабдуваат со вода, но параметрите од земените мостри од водата и натаму покажуваат високо ниво на матност. Првите мостри земени на 9 февруари, според доктор Лидија Симоноска од ЦЈЗ Охрид, покажале 28,56 проценти матност, а мострите земени на 11 февруари покажуваат матност од 10,17 отсто.
„Низ градот водата секаде е со висока матност, имаше хлор, и таа здравствено не е исправна додека не се намали на максимално дозволена концентрација на матност, 1,5 отсто“,
информира специјалистката по хигиена и здравствена екологија во Центарот за јавно здравје.
Доктор Симоновска очекува при денешното повторно земање мостри од изворот да се увиди намалување на матноста на водата бидејќи, како што рече, деновиве нема активности на каменоломот, кој е во непосредна близина на изворот во селото Шум.
„Се надевам дека матноста ќе е намалена затоа што нема никакви активности над самото извориште. Над изворите има каменолом, каде што се вклучуваат динамити и нормално има лизгање на внатрешните слоеви од земјиштето. Од внатрешноста на земјиштето, се има откачено некој слој и матноста е од тука“,
вели Симоноска.
Водата од струшкиот водовод од неделата е забранета за секаква употреба поради многу висока заматеност во изворот Шум и низ сите мерни места низ градот. Во врска со случајот предмет отвори Основното јавно обвинителство Струга кое ќе испитува причините за појавата и евентуално сторените кривични дела против животната средина и природата.