Опозициската партија остро реагираше на говорот на премиерот Христијан Мицкоски во Велес, во кој тој порача дека СДСМ се обидува да прави политика и да го злоупотребува случајот со Кочани
Омразата на Мицкоски кон семејствата на повредените и загинатите во несреќата во Кочани е загрижувачка, реагираат од опозициската СДСМ откако претходно, премиерот на партиски настан порача дека нема да дозволи злоупотреби и партизација на случајот со Кочани, предупредувајќи за манипулација која се прави со темата Кочани, односно како што кажа тој, таму се гледа како едно граѓанско движење за поддршка на Кочани полека преминува во политичко движење.
Од СДСМ велат дека Мицкоски на висок тон, видно гневен продолжил со навреди кон луѓето и родителите кои секоја сабота мирно маршираат во Кочани барајќи правда за загинатите деца и помош за повредените.
„Во својата забеганост Мицкоски денес од Велес, врескаше и ги обвинуваше родителите дека од граѓанско движење полека се претварале во „политичка партија“. Овој наратив на Мицкоски сериозно загрижува, особено поради фактот што на овој начин се повикува на јавен линч на родителите на загинатите и повредените и нивните семејства“,
велат од опозициската партија.
Дополнително велат дека со тоа што ги споменува Мартин Нешковски, малата Тамара и Смилковското езеро прави некрофилија и јавен линч врз жртвите од овие трагедии.
„Апелираме до премиерот Мицкоски да не вреска на цел глас, никого нема да исплаши. Она што загрижува кај Мицкоски е само забеганоста во неговиот наратив. Додека Мицкоски организира журки за младинската организација на неговата партија и зборува за „новата генерација“ која ќе ја продолжела визијата за Македонија, цела Македонија тагува за трагедијата во Кочани во која цела генерација, цел град ја изгуби својата иднина“,
реагираат од СДСМ.
Претходно, премиерот рече оти нема да дозволи да се прави политика на грбот на како што рече напатениот народ, ниту пак да се злоупотребуваат судбините на еден град саботирајќи го процесот на одговорност за трагичниот настан кој се случи во Кочани. Премиерот рече и дека СДСМ има позната стратегија со која ги злоупотребува сите колективни несреќи, создавајќи политика од нив.