„ВМРО-ДПМНЕ и Данела Арсовска јавно да одговорат дали во изминатава година е потпишан анекс-договор, без никаква спроведена постапка на договорот за снабдување на нафтени деривати, со кој секој литар гориво е поскап за 5-6 денари? Дали медарот и шпицен градоначлник Мицкоски и неговата градоначалничка повторно ги ставиле рацете во медот и на сметка на платата на вработените во ЈСП е направен криминал?“, прашува претседателот на градската организација на СДСМ, Васко Кичевски, коментирајќи го колапсот во ЈСП
Говорејќи за колапсот во Јавното сообраќајно претпријатие ЈСП „Скопје“, претседателот на градската организација на СДСМ, Васко Кичевски, денеска на прес-конференција во име на партијата ги повика опозицискиот лидер Христијан Мицкоски и градоначалничката на Град Скопје, Данела Арсовска, да кажат дали направиле криминал за сметка на платите на вработените во претпријатието.
„Ги повикуваме ВМРО-ДПМНЕ и Данела Арсовска јавно да одговорат дали во изминатава година е потпишан анекс-договор, без никаква спроведена постапка на договорот за снабдување на нафтени деривати, со кој секој литар гориво е поскап за 5-6 денари? Дали медарот и шпицен градоначлник Мицкоски и неговата градоначалничка повторно ги ставиле рацете во медот и на сметка на платата на вработените во ЈСП е направен криминал?“,
праша Кичевски.
Кичевски вели дека единствена причина зошто вработените на ЈСП немаат земено плата и што не функционира јавниот превоз е поради, како што вели, неспособноста на кадрите на ВМРО-ДПМНЕ и градоначалничка кои се занимаваат само со тендери и провизии.
„За само една година новата локалната власт на ВМРО-ДПМНЕ во Скопје создаде хаос и го донесе целосен колапс Јавното сообраќајно претпријатие. Долгот во ЈСП, за само една година е драстично зголемен. ВМРО-ДПМНЕ и Данела Арсовска го заглавија ова јавно претпријатие и јавниот превоз во Скопје го доведоа под прашање“,
посочи Кичевски.
Изјавата на градоначалничката Арсовска дека неисплатените плати на вработените во ЈСП се поради заостанатиот долг кој Владата го има кон претпријатието, Кичевски го оцени како манипулација и префрлање на сопствената вина врз некој друг.
„Нема долг на Владата, тоа е само очаен обид за манипулација и прикривање на неспособноста, обид сопствената вина да ја префрлат на некој друг. Заедно ветуваа бесплатен превоз за скопјани а сега велат друг дека треба да се грижи за ЈСП“,
истакна тој.
Кичевски го повика ВМРО-ДПМНЕ и мнозинството кое партијата го има во Советот на Град Скопје да работи и да понуди решение за проблемот кој самите го создале.
ВМРО-ДПМНЕ и нивната градоначалничка, додава тој, со ваквата пракса го доведуваат главниот град до целосна нефункционалност, а жртви на ваквата неодговорна градска власт се само жителите на градот Скопје.
Денеска автобусите на ЈСП во Скопје ќе сообраќаат, но за утре не се знае, најавија синдикалните организации во ова градско јавно претпријатие. Денеска тие ќе чекаат на сметките да им легне платата за септември, а ако тоа не се случи утре наутро во 4:30 часот со своите семејства ќе излезат на протест пред ЈСП и автобусите нема да сообраќаат.
Во меѓувреме, Град Скопје ги извади автобусите на ЈСП пред Владата посочувајќи дека вината за тоа што вработените во ова јавно претпријатие се уште не земале плата, е кај Владата, односно кај Министерството за образование кое му должи два милиони евра на ЈСП од блок дотации за бесплатниот превоз на средношколци.